میسورو، 24 نومبر (آئی اے این ایس) سابق چیف منسٹرٰ باسوراج بومئی نے کہا ہے کہ کرناٹک میں قیادت کی تبدیلی کی بحث دراصل چیف منسٹر سدارمیا کے دو کرداروں ’باغی‘ اور ’مصالحہ جْو‘ کے درمیان کشمکش ہے۔ بومئی کے مطابق اگر سدارمیا وہی پرانے باغی سیاستدان ہیں تو وہ کسی قیمت پر اقتدار نہیں چھوڑیں گے، لیکن اگر ان میں سمجھوتے کی جھکاؤ پیدا ہوگیا ہے تو وہ ہائی کمان کے فیصلے کے آگے جھک جائیں گے۔ انہوں نے کہا کہ رواں ماہ تک واضح ہو جائے گا کہ سدارمیا اپنی مضبوطی پر قائم رہتے ہیں یا نہیں۔ انہوں نے دعویٰ کیا کہ سدارمیا کے اقتدار میں آنے کے بعد کانگریس میں اندرونی اختلافات بڑھتے چلے گئے ہیں۔ بومئی نے کہا ہے کہ بی جے پی صورتحال کا جائزہ لے رہی ہے اور مناسب وقت پر فیصلہ کرے گی۔ دوسری جانب سدارمیا نے کہا ہے کہ وہ ہائی کمان کے فیصلے کے پابند رہیں گے اور اگر پارٹی چاہے تو وہ پانچ سال بطور چیف منسٹر کام جاری رکھیں گے۔ انہوں نے باقی مدت کے بجٹ بھی پیش کرنے کا عندیہ دیا ہے۔ حال ہی میں انہوں نے کانگریس صدر ملکارجن کھڑگے سے ملاقات بھی کی تھی ۔
