کٹھمنڈو: پاکستانی کوہ پیما سرباز خان نیپال میں واقع دنیا کی ساتویں بلند ترین چوٹی ماؤنٹ دہولاگری سَر کرنے والے پہلے پاکستانی بن گئے۔ الپائن کلب آف پاکستان نے فیس بک پر ایک پوسٹ شیئر کرتے ہوئے 8 ہزار 167 میٹر بلند چوٹی سَر کرنے میں سر باز خان کی کامیابی کے بارے میں اطلاع دی۔ دوسری جانب کلب سکریٹری کرار حیدری نے ایک فیس بک پوسٹ میں بتایا کہ سرباز خان نے کامیابی سے دنیا کی 9 چوٹیاں سر کرلی ہیں جو 8 ہزار میٹر سے زیادہ بلند ہیں۔ علی آباد، ہنزہ سے تعلق رکھنے والے سرباز نے پہاڑ سر کرنے کے ماہرانہ کیریئر کا آغاز 2016 میں کیا تھا۔ وہ نذیر صابر (ایورسٹ پر چڑھنے والے پہلے پاکستانی) اور اشرف امان (کے ٹو کی چوٹی پر پہنچنے والے پہلے پاکستانی) سے متاثر ہیں۔ 2019 میں سرباز اضافی آکسیجن استعمال کئے بغیر لہوٹسے پہاڑ کو سر کرنے والے پہلے پاکستانی بنے جو نیپال میں 8 ہزار 516 میٹر اونچی دنیا کی چوتھی بلند ترین چوٹی ہے۔ سرباز دنیا کی 8 ہزار میٹر بلند تمام 14 چوٹیاں سر کرکے پہلے پاکستانی بننا چاہتے ہیں۔ پہاڑوں کو سر کرنے کی 4 مہمات میں وہ محمد علی سدپارہ کے ہمراہ تھے، ان کی ایک ساتھ آخری مہم نیپال میں مناسلو تک تھی۔ رواں برس 2021 میں انہوں نے 8091 میٹر بلند اناپورنا اور 8848 میٹر بلند ماؤنٹ ایورسٹ کو بھی سر کیا تھا۔
