کورونا وائرس سے عوام کو بچانے حکومت کی چوکسی ضروری: محمد علی شبیر
حیدرآباد ۔5۔ مارچ (سیاست نیوز) کانگریس پارٹی نے ریاستی حکومت سے مطالبہ کیا کہ کورونا وائرس کے پھیلاؤ کو روکنے کیلئے سرجیکل ماسک کی سربراہی کو باقاعدہ بنانے اور ہینڈ سینیٹائزر کی قیمتوں میں اضافہ پر قابو پائے۔ سابق وزیر محمد علی شبیر نے کورونا وائرس کے سلسلہ میں عوام میں شعور بیداری کی ضرورت پر زور دیا اور کہا کہ حکومت کو سخت چوکسی اختیار کرنے کی ضرورت ہے۔ انہوں نے کہا کہ سرجیکل ماسک اور سینیٹائزرس کی قیمتوں میں دس گنا اضافہ ہوچکا ہے ۔ گزشتہ ہفتہ پہلے کیس کے منظر عام پر آنے کے بعد سے قیمتوں میں اضافہ ہوگیا۔ سرجیکل ماسک جو 3 تا 5 روپئے میں فروخت کیا جاتا رہا ، وہ اب 25 تا 30 روپئے میں فروخت کیا جارہا ہے۔ ہینڈ سینیٹائزر کی قیمت میں اضافہ کردیا گیا ۔ انہوں نے کہا کہ وائرس کے سلسلہ میں عوام میں خوف و دہشت کا ماحول ہے۔ حکام کو چاہئے کہ وہ عوام کو تمام احتیاطی تدابیر سے واقف کرائیں۔ ماسک پہننے اور سینیٹائزر کے استعمال کی ترغیب دی جائے۔ انہوں نے کہا کہ احتیاطی اقدامات عوام پر بوجھ نہیں بننے چاہئے ۔ انہوں نے کہا کہ سپلائی اور طلب میں کافی فرق ہے جس کے سبب قیمتوں میں اضافہ ہوچکا ہے۔ ہر شخص اپنے خاندان کے لئے ماسک خریدنا چاہتا ہے۔ حکومت کو چاہئے کہ وہ مناسب مقدار میں سرجیکل ماسک اور سینیٹائزر دستیاب رکھیں۔ سرکاری طور پر ان اشیاء کی کوئی قلت نہیں ہونی چاہئے ۔ انہوں نے کہا کہ وزیر صحت ای راجندر وائرس اور احتیاطی تدابیر کے بارے میں گمراہ کن دعوے کر رہے ہیں۔ گزشتہ سال حیدرآباد میں ڈینگو عروج پر تھا لیکن اس وقت بھی وزیر صحت نے تردید کی تھی۔ محمد علی شبیر نے وزیر صحت کو مشورہ دیا کہ وہ تردید کے بجائے سرجیکل ماسک اور سینیٹائزرس کے علاوہ ادویات کی سربراہی کو یقینی بنائیں۔ انہوں نے زائد قیمت پر فروخت کرنے والے فارماسوئٹیکلس کے خلاف کارروائی کا مطالبہ کیا۔ انہوں نے عوام سے اپیل کی کہ وہ دہشت زدہ نہ ہوں بلکہ تمام احتیاطی تدابیر اختیار کریں۔
