ہندوستان اور چین کے درمیان سرحد کے بارے میں نظریاتی اختلافات ۔ وزیردفاع کا پارلیمنٹ میں بیان
نئی دہلی۔4 ڈسمبر ۔(سیاست ڈاٹ کام) وزیر دفاع راج ناتھ سنگھ نے چین کے ساتھ سرحد کے معاملہ کو لے کر اختلافات کی بات قبول کرتے ہوئے چہارشنبہ کو لوک سبھا میں کہا کہ ہماری فوج ہر چیلنج کا سامنا کرنے کے لئے تیار ہے اور سرحد کی حفاظت کو لے کر فکر کرنے کی ضرورت نہیں ہے ۔مسٹر سنگھ نے کانگریس لیڈر ادھیر رنجن چودھری کی جانب سے وقفہ صفر کے دوران یہ مسئلہ اٹھائے جانے پر کہا کہ سرحدی سلامتی کو لے کر فوج چوکس ہے اور پوری مستعدی کے ساتھ کام کر رہی ہے ۔ فوج کسی بھی قسم کے چیلنج سے نمٹنے کے لئے تیار ہے اور اس میں کسی کو کوئی شک نہیں ہونا چاہیے ۔انہوں نے کہا ‘‘حقیقی کنٹرول لائن کو لے کر چین کے ساتھ موقف سے متعلق اختلافات چلے آرہے ہیں۔ دونوں فریقوں کے ذریعہ سر حد پر گشت کئے جانے کی عام بات ہے ۔ جس کے سبب بعض اوقات چینی فوج ہمارے رینج میں آ جاتی ہے اور کبھی کبھی ہم بھی ادھر چلے جاتے ہیں۔ سرحدی سلامتی کو لے کر فکر مند ہونے کی ضرورت نہیں ہے ’’۔مسٹر سنگھ نے کہا کہ دونوں افواج کے درمیان کبھی کبھی لڑائی کے سے حالات بھی پیدا ہوجاتے ہیں، لیکن سوجھ بوجھ سے دونوں فوجیں لڑائی بڑھنے نہیں دیتی۔ اس معاملہ پر چین کے ساتھ بات چیت کے لئے بہت سے ذرائع ہیں. طویل مدتی ایشوز کو سفارتی سطح پر حل کرنے کے بھی طریقے ہیں۔انہوں نے کہا کہ حکومت سیکورٹی ضرورتوں کے بارے میں آگاہ ہے ۔ سرحد پر سڑک، ہوائی رابطہ اور سرنگوں جیسے بنیادی ڈھانچوں کو تیار کیا جا رہا ہے ۔ انہوں نے ایک بار پھر دہرایا کہ سرحدی سلامتی کو لے کر فکر کرنے کی کوئی ضرورت نہیں ہے ۔اس سے پہلے مسٹر چودھری نے یہ مسئلہ اٹھاتے ہوئے کہا کہ ہندوستان دو دشمن ملکوں سے گھرا ہے ۔ پاکستان دہشت گردی کو فروغ دیتا ہے ۔ ہم اس کے خلاف بار بار آواز اٹھاتے رہے ہیں، لیکن پاکستان کو پناہ دینے والے چین کے خلاف ہماری پالیسی بہت نرم ہے ۔اروناچل پردیش (مشرق) سے رکن پارلیمنٹ تاپر گاؤ کی طرف سے گزشتہ دنوں ایوان میں اٹھائے گئے مسائل کا حوالہ دیتے ہوئے انہوں نے کہا کہ چین ریاست میں 50 سے 60 کلو میٹر تک گھس گیا ہے اور وہاں قبضہ کر چکا ہے ، انہوں نے پوچھا کہ پاکستان کے خلاف ہمارا موقف جارحانہ رہتا ہے ، لیکن چین کے خلاف ہماری پالیسی نرم پڑ جاتی ہے . کیا ہم چین سے ڈرتے ہیں؟
فلسطینی عوام کو ہندوستانی تائید قابل قدر : سعودیہ
نئی دہلی ۔4 ڈسمبر ۔(سیاست ڈاٹ کام) سعودی عرب فلسطینی عوام کے لئے اپنے واجبی حقوق کی بازیابی کے سلسلے میں کوششوں کو ہندوستان کی تائید و حمایت کو قدر کی نگاہ سے دیکھتا ہے ۔ سعودی قاصد سعود محمد الساطی نے آج کہا کہ ہندوستان کی طرف سے وزیراعظم نریندر مودی نے بین الاقوامی یومِ یگانگت کے موقع پر اپنے حالیہ پیام میں اعادہ کیا کہ ہندوستان فلسطینیوں کی بدستور تائید کرتا ہے۔ مودی نے گزشتہ ماہ اُمید ظاہر کی تھی کہ اسرائیل اور فلسطین کے درمیان بات چیت کا جلد احیاء ہوجائے گا اور جامع مذاکرات کے ذریعہ حل برآمد ہوگا ۔ انھوں نے اس موقع پر فلسطینی کاز کے لئے ہندوستان کی ٹھوس تائید کا اعادہ کیا ۔ انھوں نے فلسطینی عوام سے نیک تمناؤں کا اظہار کیا۔