کراچی ۔17 جون (سیاست ڈاٹ کام ) راولپنڈی ایکسپریس کے نام سے مشہور پاکستانی سابق فاسٹ بولر شعیب اختر نے ٹیم کے کپتان سرفراز احمد کو احمق قرار دے دیا۔ آئی سی سی ورلڈ کپ کے میچ میں ہندوستانی ٹیم کے ہاتھوں شکست کھانے کے پر پاکستانی غم و غصے کا شکار ہیں تو وہیں سابق کھلاڑی بھی خراب کاکردگی اور غلط فیصلوں پر سراپائے احتجاج بنے نظر آ رہے ہیں۔ ہندوستان سے ہار پر شعیب اختر نے تبصرہ کرتے ہوئے سبھی کھلاڑیوں پر شدید تنقیدکی اور اْ ن کی غلطیاں گنوائی ہیں۔شعیب اختر نے کہا ہے کہ ہندوستان کے خلاف ٹاس جیت کر آدھا میچ جیت گئے تھے لیکن کپتان نے کوشش کی کہ ہم یہ میچ نہ جیتیں، ہندوستان سے بیٹنگ کروا کر ہم نے ویراٹ کوہلی کی غلطیاں دہرائی جو انہوں نے چمپئنز ٹرافی کے دوران کی تھیں۔ شعیب نے کہا کہ مجھے سمجھ نہیں آ رہی کہ کوئی اتنا کند ذہن کپتان کیسے ہو سکتا ہے کہ جسے معلوم ہو کہ ہم رن ریٹ حاصل نہیں کر سکتے، سرفراز کو معلوم ہونا چاہئے تھا کہ ہماری بیٹنگ ہماری طاقت نہیں، ہماری بولنگ بہتر ہے، ہم نے 5 بولروں کو کھلایا جو کچھ خاص نہیں کر سکے۔ انہوں نے کہا کہ کھیل میں کوئی منصوبہ نظر نہیں آیا، سب کھلاڑی ایک جیسی بیٹنگ کر رہے تھے، کوئی معیار نظر نہیں آیا۔ شعیب اختر نے حسن علی پر تنقید کرتے ہوئے کہا کہ آپ واہگہ بارڈر پر چھلانگیں لگاتے ہو، میدان میں زور لگاو، آپ کی طاقت اور ہمت کی ضرورت گراونڈ میں ہے، یہ حرکتیں اْس وقت اچھی لگتی ہیں جب آپ 6 سے 7 وکٹیں لیں، آپ نے تو 84 رنز دے دیئے۔ شیعب نے محمد عامر پر تنقید کرتے ہوئے کہا کہ انہوں نے وکٹس لینے میں بہت دیر کی، وہ اچھے بولر ہیں لیکن اہم لمحاتمیں انہوں نے وکٹ نہیں لی اور بعد میں ان کے وکٹس لینے سے ہمیں کوئی فائدہ نہیں ہوا۔ شعیب نے مزید کہا کہ امام الحق کو بیٹنگ کی بالکل بھی ٹیکنیکس نہیں معلوم، وہ اسپنر اور فاسٹ بولر کو ایک ہی انداز میں کھیلتے ہیں اور کوئی خاص رن نہیں بنا سکے، نہ ہی کوئی ہٹ مار سکے۔ 43 سالہ سابق بولر شعیب اختر نے ماضی کا حوالہ دیتے ہوئے کہا کہ یاد رہے کہ ہندوستان ہم سے جب بھی جیتا ہے اپنی بولنگ کی وجہ سے جیتا ہے، ہماری بیٹنگ لائن ہمیشہ ہندوستان کی بولنگ کے سامنے ناکام ہوئی ہے، شعیب نے کہا کہ یہ تاثر غلط ہے کہ آپ کی بیٹنگ نہیں آپ کی بولنگ آپ کو جتاتی ہے۔ شعیب نے آخر میں ورلڈ کپ کے اگلے میچز کے لیے نا امیدی ظاہر کرتے ہوئے کہا کہ یہاں سے آگے میچز میں کچھ بنتے ہوئے نظر نہیں آ رہا، ورلڈ کپ کی دوڑ میں واپس آنا مشکل ہے۔ واضح رہے کہ اپنے تبصرے کے آخر میں شعیب اختر نے ہندوستانی عوام کو جیتنے پر مبارکباد پیش کی اور ہندوستانی کھلاڑیوں کی کارکردگی کو سراہتے ہوئے کہا کہ آپ سب تعریف کے حق دار ہیں۔
