مانچٹسر ۔17 جون (سیاست ڈاٹ کام ) ورلڈکپ 2019 کے دوران اپنے ابتدائی 5 میچوں میں صرف ایک کامیابی حاصل کرنے والے پاکستانی کرکٹ ٹیم کے کپتان سرفراز احمد ورلڈ کپ کے فائنل میں پہنچنے کے لیے پرامید ہیں۔ سرفراز احمد نے کہا کہ ہندوستان کے خلاف شکست کے بعد بہت تکلیف ہوئی۔ ایسی شکست کے بعد اکثر ٹیموں کا حوصلہ پست ہوتا ہے لیکن ہم اپنے آپ کو دوبارہ اٹھائیں گے اور ایونٹ میں واپسی کی کوشش کریں گے۔ ہند ۔ پاک میچ کا روایتی نتیجہ پاکستانی ٹیم کی شکست کی صورت میں سامنے آیا جس کی سب سے بڑی وجہ ٹیم کی کھیل کے ہر شعبے میں ناقص کارکردگی ہے۔ اس شکست کے بعد ٹیم ورلڈکپ کے پوائنٹس ٹیبل پر 9 ویں نمبر پر چلی گئی جبکہ دسویں نمبر پر صرف افغانستان ہے جسے اب تک ورلڈ کپ میں کامیابی نہیں مل سکی۔ آسٹریلیا 8، نیوزی لینڈ 7، ہندوستان 7 اور انگلینڈ 6 پوائنٹس کے ساتھ اس وقت پوائنٹس ٹیبل پر سر فہرست 4 ٹیمیں ہیں جو ممکنہ طور پر سیمی فائنل میں شامل ہونے کے لیے پسندیدہ ہیں۔تاہم یہاں سری لنکا کی ٹیم بھی 4 پوائنٹس کے ساتھ اس دوڑ میں شامل ہے، لیکن آخری 4 ٹیموں کا فیصلہ تمام گروپ میچز کے بعد ہی سامنے آسکتا ہے۔ کپتان سرفراز احمد نے بھی سیمی فائنل میں پہنچنے کی امید نہیں چھوڑی جبکہ اس حوالے سے کہا کہ ہمارے لیے ورلڈکپ ابھی ختم نہیں ہوا، ہم جانتے ہیں کہ یہ بہت مشکل ہے، ہمیں بغیر غلطی کیے اپنے تمام میچز جیتنے ہیں۔ خیال رہے کہ پاکستان کا اپنے باقی 4 میچز میں نیوزی لینڈ، جنوبی افریقہ، بنگلہ دیش اور افغانستان سے مقابلہ ہے۔ ہند۔پاک میچ سے متعلق بات کرتے ہوئے سرفراز احمد نے کہا کہ یہ درست ہے کہ ہم ورلڈکپ میں ہندوستان کے خلاف میچ نہیں جیت رہے، تاہم یہ ایک اہم میچ تھا۔سرفراز احمد نے شکست کی ذمہ داری بیٹنگ پر ڈال دی اور کہا کہ بابر اعظم اور فخر زمان نے اچھا کھیلا، تاہم بد قسمتی سے ٹیم نے یکے بعد دیگر وکٹیں گنوا کر میچ ہاتھ سے نکال دیا۔
خیال رہے کہ ہندوستان کے خلاف میچ میں پاکستانی ٹیم 117 پر ایک وکٹ کے نقصان سے 129 پر 5 وکٹوں سے محروم ہوگئی تھی۔ اس دوران بابر اعظم ، فخر زمان، محمد حفیظ اور شعیب ملک آؤٹ ہوئے تھے۔یاد رہے کہ پاکستان کو ورلڈکپ میں اپنے پہلے میچ میں ویسٹ انڈیز کے خلاف شکست کا سامنا کرنا پڑا تھا، جبکہ دوسرے میچ میں اس نے انگلینڈ کو شکست دی، سری لنکا کے خلاف تیسرا میچ بارش کی نذر ہوا لیکن اس کے بعد آسٹریلیا سے شکست کا سامنا کرنا پڑا تھا۔
