کراچی۔7 ستمبر (سیاست ڈاٹ کام ) فٹنس میں بہتری کے باوجود سرفراز احمد کی قیادت پر بدستور سوالیہ نشان برقرار ہے کیونکہ ہیڈ کوچ اور چیف سلیکٹر مصباح الحق نے بھی وضاحت کردی ہے کہ ورلڈکپ میں مایوس کن کارکردگی کے بعد سرفرازکی قائدانہ صلاحیتوں کا جائزہ لیا جا رہا ہے حالانکہ نئے سیزن سے قبل انہوں نے اپنی جسمانی حالت کو کافی بہتر بنایا ہے ۔ بورڈ ذرائع کے مطابق سرفراز احمد کو ٹی ٹونٹی میچوں تک محدود کئے جانے کا قوی امکان ہے ۔ ٹسٹ میں اوسط درجے کے نتائج کے بعد اظہرعلی کو کپتانی کیلئے موزوں سمجھا جا رہا ہے۔تفصیلات کے مطابق پاکستانی کرکٹ کی تینوں فارمیٹس میں قیادت کرنیوالے سرفراز کی کپتانی پر خدشات کے بادل بدستور چھائے ہوئے ہیں حالانکہ سرفراز احمد نے پری سیزن کیمپ میں اپنی فٹنس سے سب کو متاثر کردیا ہے اور ذرائع کا دعویٰ ہے کہ انہوں نے اپنی جسمانی حالت میں بہتری لانے کی غرض سے 7سے 9کلو وزن کم کیا ہے۔
