ممبئی ، 6 جون (یو این آئی) مہاراشٹرا کے جالنہ کے ضلعی سرکاری اسپتال میں ایک مریض کو فرش پر پڑا ہوا دکھانے والی وائرل ویڈیو کے بعد حکام نے تحقیقات شروع کر دی ہیں۔ ویڈیو میں 200 بستروں کے اسپتال میں بھیڑ اور سہولیات کی کمی کو واضح طور پر دکھایا گیا ہے ۔ ایک مریض کو نس میں سیال دیا جا رہا تھا جبکہ وہ فرش پر گدے پر لیٹا ہوا تھا۔ سریش ییوالے نے بتایا کہ ان کے رشتہ دار کو بدھ کی رات سڑک حادثے کے بعد اسپتال میں داخل کرایا گیا تھا اور نرسوں نے اسے فرش پر لیٹنے کو کہا کیونکہ وارڈ میں کوئی بستر دستیاب نہیں تھا۔ ایڈیشنل سول سرجن ڈاکٹر راجندر گڈیکر نے کہا کہ انہوں نے معاملے کی جانچ شروع کر دی ہے اور پہلے ہی ہدایت دی گئی ہے کہ کسی مریض کو فرش پر نہ رکھا جائے ۔ اگر جنرل وارڈ میں بستر دستیاب نہ ہو تو فوری طور پر چارپائی کا انتظام کیا جائے اور ذمہ داروں کے خلاف سخت کارروائی کی جائے گی۔
