نیویارک۔23 مرتبہ کی گرانڈ سلام چمپیئن سرینا ولیمز نے اپنی بیٹی اولمپیا کے ساتھ ٹینس پریکٹس کی ایک تصویر شائع کرتے ہوئے یو ایس اوپن میں اپنی آمد کا اعلان کیا ہے ۔سرینا ولیمز فروری سے ٹینس سے دور ہیں۔سرینا اگلے سال ستمبر میں40 سال کی ہو جائیں گی۔ ٹوکیو اولمپکس میں ان کا کھیلنا آسان نہیں ہوگا۔ اس سال پہلے گرانڈ سلام آسٹریلین اوپن میں وہ تیسرے راؤنڈ میں ہار گئی تھیں۔ انہوں نے اب تک اولمپکس میں ایک سنگلز اور ڈبلز میں3 گولڈ جیتے ہیں۔سرینا ولیمز کی کوچ پیٹرک موراتوگلو نے کہا ہے کہ سرینا ولیمز گرانڈ سلام یو ایس اوپن ٹینس ٹورنمنٹ نیویارک میں ہی کھیلنا پسند کریں گی۔ پیٹرک موراتوگلو نے اپنے ایک بیان میں کہا کہ38 سالہ ولیمزکوگزشتہ سال2019 میں پٹھوں میں تکلیف ہوئی تھی لیکن وہ اس کے باوجود نیویارک میں یو ایس اوپن ٹینس ٹورنمنٹ کے فائنل میں پہنچنے میں کامیاب ہوگئی تھیں۔انہوں نے کہا کہ کورونا وائرس کی وجہ سے 2020 کا گرانڈ سلیم یو ایس اوپن ٹینس31 اگست کو سخت پابندیوں کے ساتھ شروع ہونا ہے ۔ پیٹرک موراتوگلو نے امید ظاہر کی ہے کہ یقینی طور پر سرینا گرانڈ سلام جیتنے کے لئے ٹینس کورٹ میں واپس آئیں گی اور یو ایس اوپن میں کامیابی ان کا مقصد ہے جس کو پانے کے لئے وہ سر توڑ کوشش کریں گی۔پیٹرک موراتوگلو نے مزید کہا کہ کسی کھلاڑی کا مقابلے سے باہر ہونا انتہائی مشکل ہوتا ہے لہذا یو ایس اوپن جیتنے کا پہلا موقع ہوگا۔بہت پابندیاں ہوں گی تاہم مجھے سرینا سے بات کرنی ہوگی کہ آیا وہ پابندیوں کو قبول کرسکے گی یا نہیں اور ان توقعات کے مطابق کھیل سکیں گی۔ واضح رہے کہ امریکی سابق عالمی نمبر ایک اور چھ مرتبہ یو ایس اوپن چمپئن سرینا ولیمز جنوری میں کھیلے گئے پہلے گرانڈ سلام آسٹریلین اوپن کے تیسرے راؤنڈ میں ہار کر باہر ہوگئی تھیں،انہوں نے رواں سال کا آغاز آکلینڈ اوپن جیت کر کیا تھا۔پہلی بار1998 میں یو ایس اوپن سے آغاز کرنے والی سرینا 1999 میں چمپیئن بن گئی تھیں۔ اس کے بعد انہوں نے 2002 ، 2008 ، 2012 ، 2013 اور2014 میں خطاب جیتا تھا۔ وہ پچھلے سال ومبلڈن اوپن کے فائنل میں سیمونا ہالیپ سے ہار گئی تھیں۔