سری نگر: سری نگر کے گنجان آبادی والے علاقے گوجوارہ میں اسمارٹ میٹرز نصب کرنے کے خلاف مرد وخواتین نے سڑکوں پر آکر احتجاج کیا۔اطلاعات کے مطابق چہارشنبہ کے روز پائین شہر کے گوجوارہ علاقے میں اسمارٹ میٹرز نصب کرنے کے خلاف لوگوں نے پر امن احتجاج کیا۔مظاہرین نے میڈیا سے بات چیت کے دوران بتایاکہ محکمہ پی ڈی ڈی کے ملازمین چہارشنبہ کے روز علاقے میں نمودار ہوئے اور بجلی میٹرز نصب کرنے کی کوشش کی تو لوگ سڑکوں پر نکل آئے اور احتجاج کیا۔انہوں نے مزید بتایا کہ علاقے میں اکثر خاندان غریبی کی سطح سے نیچے زندگی گزر بسر کر رہے ہیں اور وہ چار ہزا ربجلی فیس ادا کرنے کی پوزیشن میں نہیں ۔ان کے مطابق گر چہ محکمہ پی ڈی ڈی کے عہدیداروں کو بھی اس بارے میں قبل از وقت جانکاری فراہم کی گئی لیکن لوگوں کی اس مانگ کی اور کوئی توجہ نہیں دی جا رہی ہے ۔ایک مقامی خاتون نے بتایا کہ ماہانہ بجلی فیس میں اضافہ کرنے میں انہیں کوئی حرج نہیں لیکن میٹرز کو نصب نہ کیا جائے کیونکہ وہ اس پوزیشن میں نہیں کہ میٹرز کے حساب سے ماہانہ بجلی فیس ادا کر سکے ۔مقامی لوگوں نے ایل جی منوج سنہا سے فوری مداخلت کی اپیل کی۔
