حیدرآباد 19 اگست (یواین آئی) مہاراشٹرا، کرناٹک کے ساتھ آندھرا پردیش کے کئی اضلاع میں گزشتہ دو دنوں سے شدید سے انتہائی شدید بارش ہورہی ہے ۔ اس کے نتیجہ میں جورالہ اور سنکے شیلا پراجکٹس میں پانی کے شدید بہاو کے سبب حکام نے اس کے دروازے کھول کر پانی چھوڑنا شروع کردیا ہے۔ صورتحال کو دیکھتے ہوئے حکام نے پیشگی اقدامات کے طور پر سری سَیلم پراجیکٹ کے 9 دروازے کھول دئیے۔ اطلاعات کے مطابق جورالہ اور سنکے شیلا سے سری سَیلم کی جانب 2,53,819 کیوسک پانی آرہا ہے ۔ اس بہاؤ کو 9 دروازوں اور دائیں و بائیں بجلی گھروں کے راستے سے نچلی سطح کی طرف منتقل کیا جارہا ہے ۔ سری سَیلم کے دروازے دوبارہ کھولے جانے کے بعد سیاحوں کی آمد میں بھی اضافہ ہونے کا امکان ہے ۔
