کراچی ۔25 ستمبر (سیاست ڈاٹ کام ) سری لنکا کی ٹیم ونڈے اور ٹی20 سیریز کھیلنے کے لیے پاکستان پہنچ گئی ہے اور انہیں بھرپور سیکیورٹی میں ہوٹل روانہ کیا گیا ۔سری لنکا کی ٹیم لہیرو تھریمنے کی قیادت میں کولمبو سے کراچی ایرپورٹ پر پہنچی جہاں ان کا پرتپاک استقبال کیا گیا۔سری لنکن ٹیم کی آمد کے پیش نظر شہر میں سیکیورٹی کے سخت اقدامات کیے گئے ہیں اور شاہراہ فیصل پر پولیس سمیت قانون نافذ کرنے والے اداروں کے خصوصی دستے بھی تعینات کیے گئے ہیں جبکہ رینجرز نے نیشنل اسٹیڈیم کا انتظام سنبھال لیا ہے۔سری لنکا کی ٹیم کراچی میں تین ونڈے میچز کھیلنے کے بعد لاہور میں تین ٹی20 میچز کھیلے گی۔دونوں ٹیموں کے درمیان تین ونڈے میچوں کی سیریز کا پہلا میچ 27ستمبر کو کراچی کے نیشنل اسٹیڈیم میں کھیلا جائے گا جس کے بعد 29 ستمبر کو دوسرا اور 2 اکتوبر کو تیسرا ونڈے میچ کھیلا جائے گا۔ اس کے بعد لاہور کا قذافی اسٹیڈیم 5، 7 اور 9اکتوبر کو تین ٹی20 میچوں کی میزبانی کرے گا اور 10اکتوبر کو سری لنکن ٹیم وطن واپس لوٹ جائے گی۔یاد رہے کہ مارچ 2009 میں سری لنکائی ٹیم پر لاہور میں دہشت گردوں کی جانب سے کیے گئے حملے کے بعد سے پاکستان پر بین الاقوامی کرکٹ کے دروازے بند ہو گئے تھے اور اس کے بعد سے ٹیم نے کوئی بھی ٹسٹ میچ اپنی سرزمین پر نہیں کھیلی۔
