لاہور۔20 ستمبر (سیاست ڈاٹ کام ) سری لنکا کیخلاف ونڈے اور ٹی ٹوئنٹی سیریز کے لئے پاکستانی ٹیم کا اعلان کل کیا جائے گا۔ یاد رہے کہ سیریز کیلیے ممکنہ 20کھلاڑیوں کا اعلان پہلے ہی کردیا گیا تھا، ان میں سرفراز احمد (کپتان)، بابراعظم،عابد علی،امام الحق، فخر زمان، احمد شہزاد، آصف علی، حارث سہیل، عمراکمل، محمد رضوان، افتخار احمد ، عماد وسیم، شاداب خان، محمد نواز، وہاب ریاض، محمد عامر،حسن علی،محمد حسنین اور عثمان شنواری کو شامل کیا گیا تھا۔ ونڈے اور ٹی ٹوئنٹی اسکواڈزکا اعلان ہفتہ کوہوگا۔ ذرائع کے مطابق انگلینڈ کیخلاف سیریز کے بعد ورلڈکپ سے باہر کئے جانے والے عابد علی کی ونڈے اسکواڈ میں واپسی کا امکان روشن ہے، ایک عرصہ سے نظر انداز افتخار احمد کو ایک بار پھر موقع دیا جاسکتا ہے، آسٹریلیا کیخلاف یواے ای میں سیریز کے دوران اچھی کارکردگی کا مظاہرہ کرنے والے محمد رضوان بھی اسکواڈ میں واپسی کیلئے مضبوط امیدوار ہیں، ان کو بطور ماہر بیٹسمین شامل کیا جائے گا۔ افتخار احمد اور محمد رضوان کو سینئرز محمد حفیظ اور شعیب ملک کی خلا پرکرنے کیلیے شامل کیا جائے گا، پاور ہٹر کی متلاشی ٹیم منیجمنٹ ایک بار عمر اکمل کی جانب دیکھ رہی ہے، ان کو ٹی ٹوئنٹی اسکواڈ میں شامل کرنے پر سنجیدگی سے غور کیا جارہا ہے، مختصر فارمیٹ کے میچز کیلیے احمد شہزاد کا نام بھی زیر غور ہے۔ونڈے ٹیم 24 ستمبر کو کراچی روانہ ہوگی جہاں سری لنکا کیخلاف پہلا میچ 27 ستمبر کو کھیلا جائے گا۔ 3 ٹی ٹوئنٹی میچز کی سیریز9 اکتوبر تک لاہور میں کھیلی جائے گی۔
