کراچی۔ یکم اکٹوبر (سیاست ڈاٹ کام ) بابر اعظم کی سنچری اور عثمان خان شنواری کی شاندار بولنگ کی بدولت پاکستان نے سری لنکا کو دوسرے ون ڈے میں67 رنز سے شکست دے کر تین میچوں کی سیریز میں 0-1 کی برتری حاصل کر لی۔ میزبان ٹیم کے کپتان سرفراز احمد نے اپنے ہوم گراؤنڈ پر 10سال بعد ہونے والے پہلے ون ڈے میچ میں ٹاس جیت کر پہلے بیٹنگ کا فیصلہ کیا۔ اوپنرز امام الحق اور فخر زمان نے ٹیم کو 73رنز کا شاندار آغاز فراہم کیا تاہم دونوں کھلاڑی زیادہ تیزی سے رنز اسکور نہ کر سکے، امام 33رنز بنانے کے بعد پویلین لوٹ گئے۔فخر زمان بھی مزاحمت کرتے نظر آئے اور ٹیم کی سنچری اور اپنی نصف سنچری کی تکمیل کے بعد ہسارنگا ڈی سلوا کی دوسری وکٹ بن گئے، انہوں نے 65 گیندوں پر 54رنز کی اننگز کھیلی۔اس کے بعد بابر اعظم اور حارث سہیل نے تیسری وکٹ کے لیے 111 رنز کی شراکت قائم کی جس کے بعد وکٹوں کے درمیان غلط فہمی کے نتیجے میں حارث کی 40رنز کی اننگز اختتام کو پہنچی۔ دوسرے سرے سے بابر نے جارحانہ بیٹنگ کا سلسلہ جاری رکھا اور لہیرو کمارا کو چوکا لگا کر ون ڈے کرکٹ میں اپنی 11ویں سنچری مکمل کی۔ بابر اعظم 115 رنز کی شاندار اننگز کھیلنے کے بعد پویلین لوٹ گئے۔پاکستان نے مقررہ اوورز میں7 وکٹوں کے نقصان پر 305 رنز بنائے، افتحار احمد نے ناقابل شکست 32 رنز کی اننگز کھیلی۔ سری لنکا کی جانب سے ہسارنگا ڈی سلوا دو وکٹیں لے کر سب سے کامیاب رہے۔ ہدف کے تعاقب میں سری لنکا کی اننگز کا آغاز کسی ڈراؤنے خواب سے کم نہ تھا اور عثمان خان شنواری کی تباہ کن بولنگ کے سبب ٹیم صرف 28 رنز پر5 وکٹیں گنوا چکی تھی۔ پانچ وکٹیں گرنے کے بعد شیہان جو سوریا اور داسن شناکا کی جوڑی وکٹ پر ڈٹ گئی اور دونوں کھلاڑیوں نے چھٹی وکٹ کے لیے 177 رنز کی شراکت قائم کر کے میچ میں سری لنکا کی واپسی یقینی بنانے کے ساتھ اپنی ٹیم کی جیت کی امیدیں بھی روشن کردیں۔ تاہم اس مرحلے پر ایک مرتبہ پھر عثمان شنواری نے کپتان کو مایوسی نہ کرتے ہوئے 96 رنز کی اننگز کھیلنے والے جے سوریا کو آوٹ کیا، ان کی اننگز میں 7 چوکے اور ایک چھکا شامل تھا۔سری لنکائی ٹیم 238 رنز پر پویلین لوٹ گئی۔پاکستان کی جانب سے عثمان خان شنواری نے عمدہ بولنگ کرتے ہوئے 5 وکٹیں لیں جس پر انہیں مین آف دی میچ دیا گیا۔
