نئی دہلی 22 اپریل (سیاست ڈاٹ کام) سری لنکا میں ہوئے متعدد خوفناک بم دھماکوں کی امیر جماعت اسلامی ہند مولانا سید سعادت اللہ حسینی نے شدید مذمت کرتے ہوئے اس کو انسانیت کے خلاف ناقابل معافی بھیانک جرم قرار دا۔ امیر جماعت نے اس عظیم سانحہ پر گہرے رنج و افسوس کا اظہار کیا اور بم دھماکوں میں جاں بحق ہوئے تقریباً دو سو افراد کے وابستگان سے اظہار ہمدردی نیز پانچ سو کے قریب زخمی ہونے والے افراد او ان کے اہل خانہ سے اظہار یگانگت کرتے ہوئے زخمیوں کی صحت یابی کے لئے اللہ تعالیٰ سے دعا کی ہے۔ مولانا سید سعادت اللہ حسینی نے اس بات پر حیرت و افسوس کا اظہار کیاکہ سالہا سال کے داخلی خلفشار اور تشدد و خونریزی کی فضاء سے گزرنے کے بعد ہمارے پڑوسی ملک میں اس وقت امن و شانتی اور سکون و عافیت کا ماحول قائم تھا جس میں پھر تشدد و جارحیت کا یہ المناک واقعہ پیش آگیا اور اچانک سینکڑوں انسانوں کو موت کا شکار بنادیا گیا جو بے حد قابل مذمت اور افسوسناک ہے۔ امیر جماعت اسلامی ہند نے کہاکہ دنیا کے مختلف ملکوں میں انسانوں کے ذریعہ جاری انسانوں کے قتلِ ناحق کا اس طرح کا سلسلہ لازماً بند ہونا چاہئے تاکہ انسانیت کی مزید توہین و تذلیل نہ ہو۔ مولانا سید سعادت اللہ حسینی نے اِس اُمید کا اظہار کیاکہ حکومت سری لنکا اِن بم دھماکوں کی تفصیلی تحقیقات کرواکے مجرمین کو کیفر کردار تک پہنچانے میں کوئی کسر نہ چھوڑے گی تاکہ آئندہ وہاں کوئی فتنہ پرداز ملکی امن و امان کو درہم برہم کرنے کی جرأت نہ کرسکے۔