دبئی ۔5 ڈسمبر (سیاست ڈاٹ کام ) انٹرنیشنل کرکٹ کونسل(آئی سی سی) نے پاکستان اور سری لنکا کے درمیان آئی سی سی ٹسٹ چمپیئن شپ میں شامل دو ٹسٹ میچز کی سیریز کے لئے حکام کا اعلان کردیا ہے اور سیریز میں عالمی شہرت یافتہ حکام امپائرنگ کے فرائض انجام دیں گے۔ پاکستان اور سری لنکا کے درمیان دونوں ٹسٹ میچوںکی سیریز11 سے 23 دسمبر تک جاری رہے گی جس کے ذریعے پاکستان میں 10سال بعد ٹسٹ کرکٹ کی واپسی ہو گی۔ 11سے 15 دسمبر تک پنڈی کرکٹ اسٹیڈیم، راولپنڈی میں میچ ریفری کی ذمہ داریاں اینڈی پائی کرافٹ نبھائیں گے میدان پر امپائرز کی ذمے داریاں رچرڈ کیٹل برو اور مائیکل گف نبھائیں گے۔ میچ میں رچرڈ ایلنگ ورتھ تھرڈ امپائر اور شوزب رضا فورتھ امپائر کے فرائض انجام دیں گے۔ 19 سے 23دسمبر تک جاری رہنے والے دوسرے ٹسٹ کے لیے جیف کروکو میچ ریفری مقررکیا گیا ہے جبکہ بروس اوکسن فورڈ اور جوئل ولسن میدان پر امپائرزکی ذمہ داریاں نبھائیں گے۔ نیشنل اسٹیڈیم کراچی میں مقرر دوسرے ٹسٹ میچ میں گریگری بریتھ ویٹ تھرڈ امپائر اور احسن رضا فورتھ امپائر ہوں گے۔ یاد رہے کہ مائیکل گف اور جوئیل ولسن اس سے قبل پاکستان اور سری لنکا کے درمیان ونڈے سیریز میں بھی امپائرنگ کی ذمہ داریاں نبھاچکے ہیں۔ پہلا ٹسٹ میچ 11تا15 دسمبر: مائیکل گف اور رچرڈ کیٹل برو(آن فیلڈ امپائر)، رچرڈ ایلنگ ورتھ (تھرڈ امپائر)، شوزب رضا(فورتھ امپائر) اور اینڈی پائی کرافٹ(میچ ریفری)۔
