ممبئی: بالی ووڈ اداکارہ سشمیتا سین کو مس یونیورس بنے 30 سال ہو گئے ہیں۔ سشمیتا سین نے 21 مئی 1994 کو مس یونیورس کا تاج پہنا تھا۔ سشمیتا ہندوستان کی پہلی خاتون ہیں جنہوں نے مس یونیورس کا خطاب جیتا ہے ۔ اس خاص دن کو یاد کرتے ہوئے سشمیتا سین نے سوشل میڈیا پر ایک پوسٹ شیئر کی ہے ۔ مس یونیورس کا ٹائٹل جیتنے کے 30 سال مکمل ہونے کا جشن مناتے ہوئے سشمیتا سین نے اپنے انسٹاگرام پر ایک پرانی تصویر شیئر کی اور ایک لمبا نوٹ لکھا۔ تصویر میں سشمیتا ایک بچی کو گود میں لیے ہوئے نظر آ رہی ہیں۔ اس کے ساتھ انہوں نے کیپشن میں لکھا، یہ چھوٹی لڑکی، جس سے میں ایک یتیم خانہ میں ملی تھی، اس نے مجھے ایک 18 سالہ لڑکی کو زندگی کا سب سے معصوم، لیکن گہرا سبق سکھایا، جسے میں آج تک جی رہی ہوں۔ یہ تصویر 30 سال پہلے لی گئی تھی، جب مس یونیورس کا تاج پہلی بار ہندوستان آیا تھا!!!
