تھرواننتاپورم: سعودی عرب جانے والی ایئر انڈیا ایکسپریس کی پرواز کو جمعہ کی صبح تکنیکی خرابی کے بعد کیرالہ کی راجدھانی ترواننت پورم میں ہنگامی لینڈنگ کرنی پڑی۔ یہ پرواز کیرالہ کے کوزیکوڈ انٹرنیشنل ایئرپورٹ سے سعودی شہر دمام جا رہی تھی۔ ہائیڈرولک سسٹم میں خرابی پیدا ہونے کے بعد اس پرواز کو 12.15 بجے کے قریب بین الاقوامی ہوائی اڈے پر اترنے کی اجازت دی گئی۔تمام 182 مسافر اور عملہ محفوظ ہے۔ترواننت پورم بین الاقوامی ہوائی اڈے نے تمام ہنگامی خدمات کو طلب کیا اور طیارے کے کپتان کو ایندھن ڈمپ کرنے کو کہا گیا اور پھر وہ بحفاظت لینڈ کر گیا۔ ایئرپورٹ اتھارٹی آف انڈیا کے حکام نے اسے ایمرجنسی لینڈنگ قرار دیا ہے۔ابتدائی طور پر حکام نے فیصلہ کیا تھا کہ طیارہ کوچین انٹرنیشنل ایئرپورٹ پر لینڈ کرے گا، لیکن بعد میں اسے تبدیل کر کے ترواننت پورم کر دیا گیا۔ ایئرلائن حکام اب مسافروں کے آگے کے سفر کے انتظامات کریں گے۔
