ریاض: (کے این واصف): سعودی عرب میں برسر کار تارکین وطن کے بچوں کو اسکولی تعلیم کے بعد اعلی تعلیم کے حصول کیلئے اپنے وطن لوٹنا پڑتا تھا۔ حالیہ عرصہ میں سعودی وزارت تعلیم نے ’’سعودی عرب میں تعلیم حاصل کرو‘‘ پروگرام کا اعلان کیا جس کا عوام میں زبردست ردعمل دیکھا گیا۔ وزارت تعلیم نے کہا کہ ’سعودی عرب میں تعلیم حاصل کرو‘ پلیٹ فارم پر 50 ہزار سے زائد غیرملکی طلبہ نے اپنے نام رجسٹریشن کروائے۔ حکام نے شارجہ میں تعلیم کی بین الاقوامی ایکسپو نمائش میں سعودی جامعات کے طلبہ اور اساتذہ کی موجودگی میں یہ بات کہی۔شارجہ نمائش میں سعودی اسٹال توجہ کا مرکز بنا رہا۔ بڑی تعداد میں طلبہ نے اسٹال کا مشاہدہ کیا اور انہوں نے مختلف شعبوں میں سعودی جامعات میں داخلہ لینے کی خواہش ظاہر کی۔ 50 ہزار سے زیادہ طلبہ نے پلیٹ فارم پر اندراج کرایا ہے اور یہ پلیٹ فارم 15 جنوری 2023 تک اندراج کیلئے کھلا رہے گا۔ اس میں اردو سمیت 10 زبانوں میں اندراج کرایا جاسکتا ہے۔اس کے ذریعے دنیا کے کسی بھی ملک کے طلبہ سعودی عرب میں تعلیم کیلئے اندراج کراسکتے ہیں۔
