ریاض، 11 جولائی (یو این آئی)سعودی عرب میں شماریاتی ادارے نے سال 2024 کے حوالے سے مملکت کی کل آبادی کے اعداد و شمار پر مشتمل رپورٹ جاری کر دی ہے ۔ رپورٹ کے مطابق مملکت کی کل آبادی 3 کروڑ 53 لاکھ تک پہنچ گئی ہے ۔ سعودی خبر رساں ادارے کی رپورٹ کے مطابق محکمہ شماریات کی جانب سے جاری اعداد وشمار پر مبنی رپورٹ میں مزید کہا ہے کہ مملکت کی مجموعی آبادی میں سعودی شہری 55.6 فیصد ہیں جبکہ یہاں مقیم غیرملکیوں کی شرح 44.4 فیصد ہے۔ مردوں کا تناسب 62.1 فیصد جبکہ خواتین 37.9 فیصد ہیں۔ عمر کے حوالے سے اعداد و شمار میں کہا گیا ہے کہ 74.7 فیصد 15 سے 65 برس کے درمیان ہیں جبکہ 14 برس اور اس سے کم عمر افراد کی شرح 22.5 فیصد ہے ۔ معمرافراد جن کی عمر 65 یا اس سے زائد ہے ان کا تناسب 2.8 فیصد ہے۔
سعودی عرب نے پہلی بار غیر ملکیوں کو مخصوص علاقوں میں جائیداد خریدنے کی اجازت دینے کا اعلان کر دیا۔ سعودی گیزٹ کے مطابق مذکورہ پیش رفت سعودی حکومت کی سرمایہ کاری کے فروغ اور رئیل اسٹیٹ سیکٹر کی توسیع کی وسیع تر کوششوں کا حصہ ہے ۔ نئے قوانین جو کہ آئندہ سال جنوری 2026 سے نافذ العمل ہوں گے ، غیر ملکی مخصوص علاقوں میں جائیداد خرید سکیں گے ، اس سے قبل سعودی عرب میں اب تک کسی بھی غیر ملکی شخص کو جائیداد خریدنے اور وہاں سرمایہ کاری کرنے کی اجازت نہیں تھی۔ مذکورہ قانون سعودی کابینہ کی منظوری کے بعد متعارف کرایا گیا ہے ، قانون کے مطابق مقدس شہروں، مکہ مکرمہ اور مدینہ منورہ میں جائیداد کی ملکیت اضافی شرائط اور سخت ضوابط سے مشروط ہوگی۔ رئیل اسٹیٹ جنرل اتھارٹی کو ان علاقوں کی نشاندہی کا اختیار حاصل ہوگا جہاں غیر ملکی جائیداد خرید سکتے ہیں، یہ نیا قانون سعودی عرب کے پریمیئم ریزیڈنسی قانون اور خلیجی ممالک کے شہریوں کے جائیداد کے حقوق سے متعلق موجودہ ضوابط سے ہم آہنگ ہے ۔ واضح رہے کہ یہ اقدام ویژن 2030 کے تحت ہونے والی وسیع اصلاحات کا حصہ ہے ، جس کا مقصد معیشت کو تیل پر انحصار سے نکال کر سعودی عرب کو عالمی سرمایہ کاری کا مرکز بنانا ہے ۔
