ریاض: سعودی عرب کے ولیعہد شہزادہ محمد بن سلمان نے ریاض میں ورلڈ اکنامک فورم کے خصوصی اجلاس کے دوران ایک خصوصی ڈائیلاگ سیشن سے خطاب میں کہا ہے کہ سعودی عرب ایک مضبوط اور مستحکم مستقبل کیلئے تمام کوششیں بروئے کار لا رہا ہے۔ ان کا کہنا ہیکہ مملکت علاقائی اور عالمی مسائل کے حل اور پائیدار ترقی کے حصول کیلئے اہم کردار ادا کرہا ہے۔سعودی ولیعہد نے کہا کہ مملکت کی حالیہ کامیابیاں صرف شروعات ہیں۔ سعودی عرب ترقی کی مزید نئی منزلوں کیحصول کے لیے دن رات کام کر رہا ہے۔ ولیعہد نے کہا کہ سعودی ویژن 2030 مملکت میں زندگی کے تمام پہلوؤں پر اثر انداز ہورہا ہے جس کے نتیجے میں ایک متحرک معاشرے کی تعمیر ہوئی ہے۔
انہوں نے معیار زندگی اور سماجی ترقی میں نمایاں بہتری کی طرف اشارہ کیا جس میں افرادی قوت میں خواتین کی شرکت 2016ء سے دگنی ہو گئی ہے۔ولی عہد نے کہا کہ سعودی ویژن 2030 ایک سفر ہے حتمی منزل نہیں۔ سعودی عرب کی موجودہ کامیابیاں صرف ابتدائی مرحلہ ہیں اور مزید بہت کچھ کرنا ہوگا۔ انہوں نے سعودی عرب کی عالمی برادری کیساتھ تعاون اور تعلقات کو مزید بہتر بنانے کی اہمیت پر زوردیتے ہوئے کہا کہ عالمی سطح پر تعاون کے فروغ سے ترقی کے مزید مواقع پیدا ہوں گے۔
