سعودیہ اور اسپین کے درمیان ایک مفاہمتی یادداشت پر دستخط کئے گئے ہیں جس کے تحت اسپین سعودی بحریہ کیلئے بحری جنگی جہاز تیار کرے گا۔ سعودی ویڑن 2030 کے مطابق ان جنگی بحری جہازوں کی تیاری مقامی طور پر کیا جائے گی۔سعودی خبر رساں ادارے ایس پی اے کے مطابق اسپین کی جہاز ساز کمپنی ناونتیا کے تیار کردہ یہ بحری جنگی جہاز کثیر الجہت جنگی ضرورتوں کو پورا کرنے کی صلاحیت کے حامل ہوں گے۔سعودی وزیر دفاع شہزادہ خالد بن سلمان نے اس بارے میں کہا ہے ‘ مقصد شاہی بحریہ کوہر طرح کے چلینجوں کیلئے تیار رکھنا ، بحری سلامتی کیلئے صلاحیتوں کو بڑھاوا دینا اور علاقائی سطح پر سلامتی اور تحفظ کو یقینی بنانا ہے۔ مفاہمتی یادداشت کے مطابق اسپین کی کمپنی جہاز سازی کا یہ کام سوفیصد مقامی انداز میں کرے گی۔ جہاز میں ایک مربوط جنگی نظام کے علاوہ جہازوں کی مرمت کا نظام بھی سعودی بحریہ کے ساتھ مطابقت کا حامل ہو گا۔سعودی فوجی صنعتوں سے متعلق اتھارٹی کے سربراہ احمد العوھلی نے اس دستخط شدہ ایم او یو کے بارے میں کہا ‘ یہ یادداشت فوجی صنعت میں مقامی ترقی اور خود کفالت کے ویڑن 2030 کے طے کردہ اہداف کی طرف پیش رفت ثابت ہوگی۔واضح رہے مفاہمتی یادداشت پر دستخطوں کیلئے منعقدہ تقریب میں سعودی وزیر دفاع شہزادہ خالد بن سلمان اور اسپین کے وزیر صنعت و تجارت نے شرکت کی۔
