ریاض:21 نومبر ( کے این واصف) واشنگٹن ڈی سی میں سعودی ، امریکی سرمایہ کاری فورم 2025 کا دوسرا ایڈیشن ’ قیادت برائے نمو‘ کے عنوان کے تحت منعقد ہوا ہے ۔ یہ فورم وزارت سرمایہ کاری کے زیر اہتمام منعقد ہوا ہے جس کے دوران سعودی اور امریکی کمپنیوں کے درمیان نئی شراکتیں ،معاہدے اور سرمایہ کاری کے منصوبوں کا ایک نیا پیکیج شروع کیا گیا ۔ ویب سائٹ کے مطابق یہ سلسلہ پہلے ایڈیشن کی کامیابیوں کا تسلسل ہے جو مئی میں ریاض میں منعقد ہوا تھا ۔ فورم سے خطاب کرتے ہوئے سعودی وزیر سرمایہ کاری انجنیئر خالد بن عبدالعزیز نے واضح کیا ہے کہ امریکی اور سعودی کمپنیوں کے درمیان سرمایہ کاری اور معاہدات کا مجموعی حجم 575 ارب امریکی ڈالر تک پہنچ گیا ہے ۔ یہ معاہدے شراکت داری کو مزید مضبوط بناتا ہیں اور انہیں دنیا کی طویل ترین اور سب سے زیادہ متحرک معاشی شراکت داریوں میں شمار کرتے ہیں ۔ انہوں نے بتایا ہے کہ اس مجموعی سرمایہ کاری میں 307 ارب ڈالر وہ ہیں جن کا اعلان گزشتہ مئی میں امریکی صدر ڈونالڈ ٹرمپ کے دورہ ریاض کے موقع پر کیا گیا تھا ۔ بعد ازاں ہونے والی دو طرفہ مفاہمتوں میں 267 ارب ڈالر مالیت کے نئے سودے بھی شامل ہیں جو سعودی ۔ امریکی سرمایہ کاری فورم میں طئے پائے ۔ انہوں نے کہا کہ ان معاہدوں میں جدید نوعیت کی کئی بڑی شراکتیں شامل ہیں جو توانائی ، مصنوعی ذہانت ، دفاع ، خلاء ، مالیات ، تعلیم ، بنیادی ڈھانچے اور صحت کے شعبوں میں اسٹریٹیجک تعاون کو تقویت دیتی ہیں ۔