سعودی عرب کی قومی ایر لائن السعودیہ نے اعلان کیا ہے کہ اگلے ماہ نومبر سے 33 شہروں کے لیے فلائٹس کا دوبارہ آغازکر رہی ہے۔تفصیلات کے مطابق ان 33 شہروں میں براعظم یورپ، ایشیا اور افریقہ کے کئی بڑے ایرپورٹ شامل ہیں۔السعودیہ کے مطابق امریکہ کے لیے سفر کرنے والے سعودی شہری صرف واشنگٹن کے ایرپورٹ جا سکیں گے۔ایر لائن نے کہا ہے کہ ان فلائٹس میں صرف ان مسافروں کو سفر کی اجازت ملے گی جو سعودی عرب کی حکومت کی جانب سے کورونا وائرس کے حوالے سے فضائی سفر کے طے کردہ حفاظتی اقدامات پر عمل کریں گے۔سعودی عرب میں کورونا وائرس کی وجہ سے کئی ماہ تک فضائی سفر پر پابندیوں کے بعد مملکت کی قومی ایر لائن نے 15 ستمبر کے بعد دنیاکے 20 شہروں کے لیے اپنی فلائٹس دوبارہ شروع کی تھیں۔سعودی عرب کی وزارت داخلہ نے اعلان کیا ہے کہ بیرون ملک سفرکے حوالے سے تمام پابندیاں اگلے سال کے آغاز پر ختم کی جائیں گی۔کورونا وائرس کے پھیلاؤ سے قبل السعودیہ دنیا کے 85 شہروں کے ایر پورٹس کے لیے فلائٹس کی خدمات فراہم کرتی تھی۔خیال رہے کہ عالمی وبا کے باعث دنیا بھر میں ایر لائن صنعت کو بدترین بحران کا سامنا کرنا پڑا ہے۔
