ریاض، 21 اگست (یو این آئی) معروف سعودی شاعر سعود بن معدی الرفاعی القحطانی عمان میں پہاڑ سے گرنے سے انتقال کر گئے ۔غیر ملکی میڈیا رپورٹس کے مطابق سعودی شاعر عمان کے علاقے دوہفر گورنریٹ میں جبل سمحان کی اونچی چٹان سے اچانک گرنے کے بعد انتقال کر گئے ۔میڈیا رپورٹس کے مطابق سعود بن معدی کی موت سے قبل کی ویڈیو سوشل میڈیا پر وائرل ہے ، جس میں انہیں جبل سمحان کی خطرناک پہاڑی پر چڑھائی کرتے دیکھا جاسکتا ہے ۔ ناہموار پہاڑ پر چڑھائی کے دوران سعود بن معدی اچانک توازن برقرار نہ رکھتے ہوئے پھسل گئے ، جس سے انہیں شدید چوٹیں آئیں۔ انہیں فوری طبی امداد فراہم کرتے ہوئے مقامی اسپتال منتقل کیا گیا تاہم وہ جانبر نہ ہوسکے ۔مسقط میں سعودی سفارت خانے کے مطابق سعود بن معدی کی لاش کو سعودی عرب واپس بھیجنے کے لیے متعلقہ عمانی حکام کے ساتھ مل کر کام کر رہے ہیں۔واضح رہے کہ سعودی شاعر سعود بن معدی الرفاعی القحطانی کا تعلق سعودی شہر الباحہ کے علاقے میں القحطہ سے ہے ۔سعود بن معدی خلیجی اور عرب ممالک میں اپنی شاعری میں عرب ورثے اور جدیدیت کے امتزاج کیلئے شہرت رکھتے تھے ۔ انہوں نے عربی زبان میں 15 سے زیادہ شعری مجموعے شائع کیے ہیں۔
