سعودی عرب:گذشتہ 24 گھنٹے میں کوویڈ۔19کے 169 نئے کیسوں کی تشخیص

   

ریاض: سعودی عرب میں گذشتہ 24 گھنٹے میں کوویڈ۔19کے 169 نئے کیسوں کی تشخیص کی گئی ہے جبکہ پہلے سے اس مہلک وائرس کا شکار 188 مریض صحت یاب ہوگئے ہیں۔وزارتِ صحت کے مطابق مملکت میں اب کوروناوائرس کے یومیہ کیسوں کی تعداد میں 98 فی صد تک کمی واقع ہوئی ہے۔سعودی عرب میں اب کوویڈ۔19 کے کل کیسوں کی تعداد 364440 ہوگئی ہے۔ان میں سے 356201 مریض صحت یاب ہوچکے ہیں اور 6310 مریض وفات پاچکے ہیں۔سعودی عرب کی وزارتِ تعلیم نے چہارشنبہ کو یہ اعلان کیا تھا کہ رواں تعلیمی سال کے دوسرے سیمسٹر میں بھی کوروناوائرس کی وبا کے پیش نظر فاصلاتی تدریس جاری رہے گی اور اسکولوں اور اعلیٰ تعلیمی اداروں میں زیرتعلیم تمام درجوں کے طلبہ وطالبات آن لائن اپنی پڑھائی کا سلسلہ جاری رکھیں گے۔سعودی عرب نے اپنے شہریوں کوکوروناوائرس کی وَبا سے تحفظ کے پیش نظر 12ممالک کے غیرمجاز سفرسے روک دیا ہے اور انھیں ہدایت کی ہے کہ وہ مجازحکام کی اجازت کے بغیر ان ممالک کا سفر نہ کریں۔