ریاض : سعودی عرب کے فوجی اخراجات پچھتر ارب ڈالر کی ریکارڈ سطح پر پہنچ گئے، سعودی عرب میں دفاعی اخرجات میں ایک سال کے دوران سولہ فیصد اضافہ ریکارڈ کیا گیا۔سویڈن میں قائم اسٹاک ہوم انٹرنیشنل پیس ریسرچ انسٹی ٹیوٹ کی دوہزار بائیس میں عالمی فوجی اخراجات سے متعلق رپورٹ کے مطابق سعودی عرب فوجی اخراجات میں اضافہ کے حوالے سے دنیا میں پانچویں نمبر پر موجود ہے۔ یہ اعداد و شمار اس سے ایک سال پہلے کے مقابلہ میں 16 فیصد زیادہ ہیں، تب وہ عالمی سطح پرفوجی اخراجات میں آٹھویں نمبر پر تھا۔7.4 فیصد اضافہ کے ساتھ سعودی عرب نے یوکرین کے علاوہ کسی بھی دوسرے ملک کے مقابلہ میں دفاع پر اپنی جی ڈی پی کا زیادہ خرچ کیا ہے۔ واضح رہے کہ دنیا بھر میں مجموعی طور پر دفاع پر سب سے زیادہ خرچ کرنے والے تین ممالک امریکہ، چین اور روس ہیں۔پورے مشرق اوسط کے خطہ نے 2022 میں دفاع پر 184 ارب ڈالر خرچ کیے۔اس کے مقابلہ میں اسرائیل کے دفاعی اخراجات 4.2 فی صد کم ہوکر 23.4 ارب ڈالر رہ گئے ہیں کیونکہ اس نے اپنے بجٹ کو متوازن رکھنے کے لیے کٹوتیاں کی ہیں۔مجموعی طور پر عالمی فوجی اخراجات میں 3.4 فیصد اضافہ ہوا اور یہ 22کھرب 20 ارب (2.2 ٹریلین) ڈالر کی تاریخ کی بلند ترین سطح پر پہنچ گیا۔ذرائع کے مطابق شہری دفاع اور موجودہ فوجی سرگرمیوں پراخراجات بشمول سابق فوجیوں کی مراعات اور فوائد، ڈی موبلائزیشن، ہتھیاروں کی تلفی اورغیر فوجی سرگرمیوں میں فوج کی شمولیت وغیرہ کے اخراجات کو اس رپورٹ میں شامل نہیں کیا گیا ہے۔
