ریاض، 18 مارچ (سیاست ڈاٹ کام) سعودی حکومت نے آج نجی شعبہ کے کاروبارکیلئے کورونا وائرس کے پھیلائو کو روکنے کے لئے نئی ہدایات جاری کرتے ہوئے ان کے ملازمین کو گھر سے کام کرنے کی ہدایت دی ہے۔ سعودی عرب کی سرکاری خبر رساں ایجنسی سعودی پریس ایجنسی کے مطابق وزارت انسانی وسائل و سماجی بہبود نے نجی شعبے کے دفاتر کو ہدایت کی ہے کہ وہ آئندہ 15 دنوں کے لئے دفاتر بند کر کے اپنے ملازمین سے گھروں میں محدودرہ کر کام جاری رکھیں۔ ان دفاتر کو مزید ہدایت دی گئی کہ وہ دفاتر میں موجود ملازمین کی تعداد کو کم کر کے صرف ضروری ملازمین کو بلائیں تاکہ حکومت کی جانب سے جاری احتیاطی احکامات کی روشنی میں کام جاری رہ سکے۔