ریاض: سعودی عرب کے دارالحکومت الریاض میں ایک خوفناک سڑک حادثے کے نتیجے میں کم سے کم چار افراد جاں بحق اور 23 زخمی ہوگئے ۔یہ حادثہ ریاض کے قریب بیشہ الرین روڈ پر گرد وغبار کے دوران 13 گاڑیوں کے آپس میں ٹکرانے سے ہوا۔اس واقعہ کی ایک ویڈیو سوشل میڈیا پر وائرل ہوئی ہے جس میں حادثے کا شکار ہونے والی گاڑیوں کی تباہی کو دیکھا جا سکتا ہے ۔ویڈیو میں دیکھا جا سکتا ہے کہ تیز ہوا اور گردوغبار کے بعد راستہ صاف دکھائی نہ دینے کی وجہ سے 13 سے زائد کاریں مین روڈ پر آپس میں ٹکرا گئیں۔ کاریں اپنے راستے سے ہٹ کر سڑک کے دونوں طرف جا گریں جہاں ٹرانسپورٹ ٹرک آپس میں ٹکراگئے تھے ۔ دوسری جانب الرین جنرل ہسپتال کے حکام کا کہنا ہے حادثہ میں 23 افراد زخمی ہوئے جن میں سے چار افراد کی موت واقع ہوگئی۔سعودی ہلال احمر کی طرف سے کچھ زخمیوں کو ہسپتال کی ایمرجنسی میں منتقل کیا گیا۔ جہاں طبی ٹیموں نے ضروری ابتدائی طبی امداد فراہم کی۔
زخمیوں میں سے چار کو ہسپتالوں میں داخل کیا گیا ہے جب کہ 8 زخمیوں کو فوری طبی امداد کی فراہمی کے بعد اسپتال سے رخصت کر دیا گیا تھا۔