ریاض۔11 اپریل (سیاست ڈاٹ کام) سعودی عرب کی جیلوں میں قیدیوں کو تعلیم کی سہولتیں موجود ہیں اور وہ تعلیم کے زیور سے آراستہ بھی ہورہے ہیں۔ قیدیوں کو معاشرے میں اچھے شہری کے طور پر زندگی گزارنے کے قابل بنانے کیلئے مختلف ہنر بھی سکھائے جاتے ہیں۔سعودی خبررساں ادارے کے مطابق مشرقی علاقوں کی جیلوں کے قیدیوں نے رواں تعلیمی سال کے دوران امام عبدالرحمن بن فیصل یونیورسٹی میں داخلے لیے تھے۔انہیں جیلوں میں آن لائن تعلیم کی سہولتیں فراہم کی گئی تھیں۔قیدیوں نے تعلیمی سال کے اختتام پر امتحان دینے کی درخواستیں دیدیں۔الشرقیہ جیلوں کی انتظامیہ نے اعلان کیا ہے کہ دمام جیل، القطیف جیل اور الخبر جیل میں قیدی طلبہ کے امتحان آن لائن لیا جائے گا۔رواں سال کورونا وائرس سے بچاؤ کے لیے احتیاطی تدبیر کے طور پر یہ انتظام کیا جا رہا ہے۔محکمہ نے اطمینان دلایا ہے کہ قیدیوں کو امتحان دینے کے لیے مناسب ماحول مہیا کر دیا گیا ہے۔محکمہ مملکت کے مختلف صوبوں میں تعلیمی اداروں اور یونیورسٹیوں کے تعاون سے قیدیوں کو اسکولوں اور کالجوں کا کورس پڑھانے کا انتظام کیے ہوئے ہے۔ اس کام پر مختلف مضامین کے ماہر اساتذہ مقرر ہیں۔قیدیوں کو امتحان ہال میں جانے سے قبل تمام حفاظتی سہولتیں مہیا کی جائیں گی۔حفاظتی ماسک اور دستانے تقسیم کیے جائیں گے اور سینیٹائزنگ کا اہتمام کیا جائے گا۔
