ریاض ۔ وزارت صحت کے سیکرٹری برائے امور صحت ڈاکٹرھانی جوخدار نے کہا ہے کہ سعودی عرب میں کورونا ویکسین کا استعمال ماہ رواں کے آخرتک شروع کر دیا جائے گا۔ ڈاکٹرھانی نے مزید کہا کہ وزارت صحت اور سعودی فوڈ اینڈ ڈرگ اتھارٹی کی جانب سے کورونا ویکسین کی رجسٹریشن کی منظوری ملنے کے بعد اس کی درآمد کی تیاریاں مکمل کرلی گئی ہیں۔ویکسین کی سعودی میں آمد کے ساتھ ہی اسے مریضوں کو لگانے کا عمل شروع کر دیا جائے گا۔انہوں نے مزید کہا کہ متعلقہ اداروں نے ویکسین کی رجسٹریشن سے قبل تمام احتیاطی تدابیرکا بغور جائزہ لیا اور اس کے تجربات پر مبنی رپورٹیں بھی حاصل کی تھیں جن میں اس ویکسین کے بہترنتائج اور مرض میں اس کی افادیت واضح ہے۔سعودی عرب میں ویکسینیشن کے عمل کے آغاز کے حوالے سے ڈاکٹر جوخدار نے کہا ہے کہ ویکسین کی رجسٹریشن کے بعد اب دوسرے مرحلے کی جانب بڑھ رہے ہیں جو اسے سعودی لانے کا ہے اس حوالے سے بھی فوڈ اینڈ ڈرگ اتھارٹی کی جانب سے تمام ترتیاریاں مکمل کرلی گئی ہیں۔توقع ہے کہ آئندہ چند دنوں میں ویکسین محفوظ طریقے سے مملکت پہنچ جائے گی جس کے بعد فوری طور پر اسے مریضوں کو لگانے کے مرحلے کا آغاز کیا جائے گا۔
