ریاض ۔12 جون(سیاست ڈاٹ کام) سعودی عرب میں کھیلوں پر عائد پابندیاں 21 جون سے ختم کی جا رہی ہیں۔ وزارت کھیل کی جانب سے منظوری جاری کردی گئی۔ ٹریننگ اور اسپورٹس کی سرگرمیوں کی اجازت ہوگی لیکن وزارت صحت کی مقررہ شرائط کی پابندی کرنا لازمی ہوگا۔ وزارت کھیل کی جانب سے جاری بیان کے حوالے سے مقامی ویب نیوز نے کہا ہے کہ سعودی عرب میں سپورٹس کلبزکو ٹریننگ اور کھیلوں کی سرگرمیاں جاری رکھنے کی مشروط اجازت دی گئی ہے جس میں سب سے اہم شرط تماشائیوں کی غیر حاضری ہے۔یاد رہے کہ وزارت کھیل نے کورونا وائرس کی وجہ سے احتیاطی تدابیر اختیار کرتے ہوئے 14 مارچ سے سعودی عرب کے تمام شہروں میں کھیلوں ، ٹریننگ اور ٹورنمنٹس پرتاحکم ثانی مکمل پابندی عائد کرتے ہوئے میدان بھی عارضی طور پر بند کر دیے تھے۔ اس ضمن میں وزارت کھیل کی جانب سے مزید کہا گیا ہے کہ ملک میں وبائی مرض کورونا کے انسداد کی کمیٹی سے رابطہ کر نے کے بعد مختلف امورکا جائزہ لے کر فیصلہ کیا گیا ہے کہ کھیلوں کی سرگرمیوں کو جاری رکھنے کی مشروط اجازت دے دی جائے۔ وزارت نے مزید کہا ہے کہ تمام اسپورٹس کلبز اس امر کی یقین دہانی کرائیں گے کہ کورونا وائرس کے پھیلاؤ کو روکنے کے لیے مقررہ ایس او پیز پرمکمل عمل درآمد کیا جائے گا۔اسپورٹس کی کسی بھی سرگرمی میں شائقین نہیں ہوں گے، علاوہ ازیں مقررہ کمیٹی کی جانب سے جاری ہدایات پر مکمل عمل کرنا لازمی ہوگا۔ مزید کہا گیا ہے کہ وزارت کھیل سعودی یونین آف اسپورٹس کمیٹی کے تعاون سے مرتب کیے جانے والے ایس او پیز پر عمل درآمد کو یقینی بنانے کے لیے نگرانی کے عمل کو جاری رکھے گی۔ اس ضمن میں وزیر کھیل شہزادہ عبدالعزیز بن ترکی نے فوری طور پر نگران کمیٹی کے قیام کی بھی منظوری دی ہے جو اسپورٹس سرگرمیوں کے دوران مقررہ ایس او پیز پر عمل درآمد کا جائزہ لے کر اپنی رپورٹ سے مسلسل وزارت کو مطلع کرے گی۔