ریاض ۔18جون (سیاست ڈاٹ کام) سعودی وزیر سیاحت احمد الخطیب نے کہا ہے کہ ملک بھر میں اتوار21 جون سے سیاحت کا شعبہ مکمل طور پر بحال ہو جائے گا۔ ویب سائٹ کے مطابق عرب وزرائے سیاحت کے ہنگامی ویڈیو اجلاس کے موقع پر العربیہ سے گفتگو کرتے ہوئے انہوں نے کہا کہ سیاحت ایسا شعبہ ہے جس کے کارکنان کی تعداد کل ملازمتوں کا بارہ فیصد ہے اورعرب ممالک کی 13 فیصد قومی مجموعی پیداوار سیاحت سے حاصل ہوتی ہے۔الخطیب نے توجہ دلائی کہ سیاحت کے شعبے میں 80 ملین سے زیادہ ملازم ہیں، ان سب کو کورونا وائرس کی وبا کی وجہ سے اپنی ملازمتیں خطرے میں نظر آرہی ہیں۔الخطیب نے کہا کہ سعوی عرب ماہ رواں کے آخر میں سیاحتی سرگرمیاں بحال کر لے گا، دیگر عرب ممالک بھی سیاحتی پروگرام شروع کردیں گے۔انہوں نے مزید کہا کہ کئی ممالک نے سیاحتی پروگراموں کا آغاز کردیا ہے۔ سعودی عرب 21 جون سے سیاحتی شعبہ 24 گھنٹے کے لیے کھول دے گا تاہم مکہ اس سے مستثنٰی ہوگا۔الخطیب نے مزید کہا کہ موسم گرما کا سیاحتی پروگرام شروع کرنے کی تیاریاں کیے ہوئے ہیں۔ مقامی شہریوں نے رائے عامہ کے جائزے میں بتایا کہ 80 فیصد داخلی سیاحت کے خواہش مند ہیں اور وہ بیرون ملک سفر میں دلچسپی نہیں رکھتے۔انہوں نے مزید کہا کہ مقامی شہریوں کی جانب سے داخلی سیاحت میں دلچسپی کے تناظر میں سیاحت کی بحالی کے بہت سارے پروگرام تیارکرلیے گئے ہیں۔
