واشنگٹن، 28 اکتوبر (یواین آئی) اقوامِ متحدہ میں سعودی عرب کے مستقل نمائندے ڈاکٹر عبدالعزیز الواصل نے فلسطینی عوام کیلئے اپنے ملک کے مضبوط اور غیر متزلزل مؤقف کا اعادہ کرتے ہوئے کہا ہے کہ سعودی عرب دو ریاستی حل پر قائم ہے ۔اقوام متحدہ میں سعودی عرب کے مستقل نمائندے ڈاکٹر عبدالعزیز الواصل نے فلسطینی عوام کیلئے اپنے ملک کے مضبوط اور غیر متزلزل موقف کا اعادہ کرتے ہوئے کہا کہ مملکت نے فرانس کے ساتھ مل کر دو ریاستی حل کانفرنس کی قیادت کی۔ اسی تناظر میں انہوں نے ایک بار پھر اسرائیلی کنیسٹ کی طرف سے مقبوضہ مغربی کنارے کو الحاق کرنے اور غیر قانونی نوآبادیاتی آباد کاری پر اسرائیلی خودمختاری کو قانونی حیثیت دینے کیلئے دو مسودہ قوانین کی منظوری کی مذمت کی۔ انہوں نے کہا مملکت سعودی عرب اسرائیلی قابض حکام کی طرف سے اختیار کی گئی تمام آباد کاری اور توسیع پسندانہ خلاف ورزیوں کو مکمل طور پر مسترد کرنے پر زور دیتی ہے اور متعلقہ بین الاقوامی قراردادوں کے مطابق مشرقی القدس کے ساتھ 1967 کی سرحدوں پر اپنی آزاد ریاست کے قیام کے فلسطینی عوام کے موروثی اور تاریخی حق کی حمایت کا اعادہ کرتی ہے ۔ یاد رہے مملکت سعودی عرب عالمی برادری کی اہمیت پر بھی زور دیتی ہے کہ وہ بین الاقوامی قانونی قرار دادوں پر عمل درآمد کیلئے اپنی پوری ذمہ داری قبول کرے ۔ فلسطینی علاقوں اور فلسطینی عوام پر تمام صریح اسرائیلی حملوں کو روکے اور دو ریاستی حل کے نفاذ کی بنیاد پر امن عمل کو آگے بڑھائے ۔
