ریاض ۔ سعودی عرب نے سال 2021 کے لئے 990 ارب ریال کے بجٹ کا اعلان کردیا۔ آمدنی کا تخمینہ 849 ارب ریال لگایا گیا ہے جبکہ 2020 کے خسارے کو کم کرکے 141 ارب ریال پر لائے جانے کا اشارہ دیاگیا ہے۔ سعودی خبررساں ایجنسی ایس پی اے کے مطابق خادم حرمین شریفین شاہ سلمان بن عبدالعزیز نے بجٹ اجلاس کی آن لائن سربراہی کی۔اجلاس سے خطاب کرتے ہوئے خادم حرمین شریفین شاہ سلمان بن عبدالعزیز نے کہا کہ راوں سال دنیا بھرکو کورونا کی وبا کا سامنا کرنا پڑا جس نے دنیا کی معیشت پرگہرے منفی اثرات مرتب کئے۔ کورونا کی وبا سے نمٹنے کے لیے تمام تراحتیاطی تدابیر اختیار کرتے ہوئے کورونا میں مبتلا ہونے والے شہریوں اور غیر ملکیوں کے وہ غیر ملکی جو غیر قانونی طور پر مقیم تھے کو بھی مفت علاج معالجے کی سہولت فراہم کی گئی۔وبا کے دوران سعودی کابینہ نے امور صحت سے منسلک کورونا کی وبا سے ہلاک ہونے والے ہرکارکن کے لئے 5لاکھ ریال مختص کئے تھے۔
