جدہ 15 اکتوبر(یواین آئی ) سعودی عرب کی ٹیم نے فیفا ورلڈ کپ 2026 کے لئے باضابطہ طور پر کوالیفائی کرلیا ہے ، تفصیلات کے مطابق سعودی عرب اور عراق کی فٹ بال ٹیموں کے درمیان کھیلا گیا فیصلہ کن میچ بغیر کسی گول کے برابر ی پر ختم ہوگیا ، دونوں ٹیمیں کوئی گول نہ کرسکیں۔جدہ کے کنگ عبداللہ اسپورٹس سٹی کے الانما اسٹیڈیم میں میچ کا آغاز ہوا تو گرین فالکنز نے میچ کے دونوں ہاف میں گول کرنے کے مواقع گنوا دیئے ۔ میچ شروع ہونے سے قبل ہی اسٹیڈیم کے تمام اسٹینڈز بھر گئے ۔ میچ دیکھنے کے لیے اسٹیڈیم میں60 ہزار افراد موجود تھے ۔ سعودی وزیر اسپورٹس اور دیگر عہدیداروں نے بھی اسٹیڈیم میں بیٹھ کر میچ دیکھا۔گرین فالکنز نے ساتویں مرتنہ فیفا ورلڈ کپ کے لیے کوالیفائی کرکے ایک تاریخ رقم کی ہے ۔ گرین فالکنز کو فیفا ورلڈ کپ 2026 کوالیفائی کرنے کے لیے عراق کے ساتھ میچ میں کامیابی یا کم از کم ڈرا کھیلنا تھا ۔اسے گول اوسط کے لحاظ سے عراقی ٹیم پر برتری حاصل تھی جبکہ عراقی ٹیم کو براہ راست کوالیفائی کرنے کے لیے یہ میچ جیتنا ضروری تھا۔ دونوں ٹیمیں ایشیائی پلے آف کے گروپ ’بی‘ میں شامل ہیں۔اس میچ میں سعودی ٹیم گول کیپر نواف العقیدی، صالح ابو الشامات، حسان تمبکتی، جھاد ذکری، ایمن یحیی، عبداللہ الخیبری، ناصر الدوسری، مصعب الجویر، صالح ابو الشامات، فراس الریکان اور سالم الدوسری پر مشتمل تھی۔یاد رہے سعودی عرب نے انڈونیشیا کو 2-3 سے شکست دی تھی جبکہ عراق نے اسی ٹیم کو 0-1گول سے ہرایا تھا۔اس کامیابی کے بعد جشن کا ماحول دیکھا گیا۔
