ریاض ۔ فرانس میں گذشتہ ماہ منعقدہ کانز فلم فیسٹیول میں پہلی سعودی فلم کے طور پر آفیشیل کیلنڈر میں منتخب ہونے والی فلم ’نورہ ‘ نے تاریخ رقم کی ہے۔ عرب میڈیا کے مطابق ریڈ سی فلم فاؤنڈیشن نے اعلان کیا ہے کہ یہ فلم 20 جون کو مملکت اور بین الاقوامی سینما گھروں میں نمائش کے لیے پیش کی جائے گی۔ ہدایتکار توفیق الزیدی کی بنائی گئی فلم ’ نورہ‘ مئی میں فرانس میں منعقدہ 77ویں کانز فلم فیسٹیول میں شامل ہونے سے قبل دسمبر 2023 میں جدہ میں ریڈ سی انٹرنیشنل فلم فیسٹیول میں اس کا پریمیئر ہوا تھا۔ سعودی فلم نورہ کی مکمل شوٹنگ العلا میں کی گئی ہے اور فلم میں1990 کی دہے کا سعودی عرب دکھایا گیا ہے ، اس کی مکمل کاسٹ سعودی عرب سے ہے۔ یہ فلم ریڈ سی فلم فاؤنڈیشن کے پروگراموں میں سے ایک ہے جو مکمل طور پر ریڈ سی فنڈ سے بنائی گئی ہے۔ فلم کی کاسٹ میں ماریہ بحراوی، یعقوب الفرحان اورعبداللہ الثتیان شامل ہیں۔ یہ فلم نورہ اور نادرکی کہانی ہے جو دیہی علاقے میں رہتے ہوئے استاد کے طور پر فنکارانہ صلاحیتوں کو ابھارنے کی ترغیب دیتے ہیں۔
