ریاض ۔ 18 نومبر (ایجنسیز) واشنگٹن میں سعودی عرب کی خاتون سفیر شہزادی ریما بنت بندر نے سعودی ولیعہد شہزادہ محمد بن سلمان کے امریکہ کے دورہ کو سعودی ۔ امریکی تعلقات میں ایک نیا اور اہم باب قرار دیا ہے۔شہزادی ریما نے کہا کہ یہ دورہ دونوں دوست ممالک کی قیادت کی توقعات کے مطابق ہو گا اور اس تزویراتی تعلق کو وسیع تر افق کی جانب بڑھانے میں مدد دے گا، جس سے ہمارے مشترکہ مفادات مضبوط ہوں گے اور عالمی امن و استحکام میں بھی کردار ادا ہو گا۔”سعودی خاتون سفیر نے پہلے بھی اس بات پر زور دیا تھا کہ ریاض اور واشنگٹن کے درمیان تعلقات اس وقت اپنی تاریخ میں سب سے مضبوط ہیں۔ ان کے مطابق امریکہ صرف سعودی عرب کے بحران حل کرنے کے کردار کو خوش آمدید نہیں کہتا بلکہ اسے ضروری بھی سمجھتا ہے۔سعودی ولیعہد شہزادہ محمد بن سلمان آج واشنگٹن کا دورہ کر رہے ہیں جو وقت اور اہمیت کے لحاظ سے غیر معمولی قرار دیا گیا ہے۔ یہ شہزادے کا دوسرا امریکی دورہ ہے۔ ، پچھلا دورہ انہوں نے 2015 میں تقریباً سات سال قبل کیا تھا۔سعودی شاہی محل نے اعلان کیا کہ سعودی بادشاہ سلمان بن عبدالعزیز کے حکم پر اور امریکی صدر ڈونالڈ ٹرمپ کی طرف سے ولیعہد کو دی گئی دعوت پر، شہزادہ محمد بن سلمان آج پیر کے روز سرکاری دورے کیلئے امریکہ روانہ ہوئے۔دورے کے دوران ولیعہد صدر ٹرمپ سے ملاقات کریں گے اور دوطرفہ تعلقات کو مضبوط بنانے کے مختلف شعبوں پر بات چیت کریں گے۔ علاوہ ازیں، وہ مشترکہ دل چسپی کے امور اور عالمی و علاقائی چیلنجز پر تبادلہ خیال کریں گے۔
