ریاض، 12 اگست (یو این آئی) فلسطین کے صدر محمود عباس اور سعودی ولیعہد شہزادہ محمد بن سلمان کے درمیان ٹیلی فونک رابطہ ہوا ہے۔محمود عباس اور محمد بن سلمان نے فلسطینی کاز، فلسطینیوں کو درپیش حالیہ صورتحال اور چیلنجز پر بات چیت کی۔دونوں رہنماؤں کے درمیان غزہ کی پٹی کی صورتحال، اس کے سکیورٹی اور انسانی اثرات پر بھی بات چیت ہوئی جب کہ اس دوران سعودی ولیعہد نے فلسطینی عوام کے خلاف کیے جانے والے جرائم کی مذمت کا اعادہ کیا۔ صدر محمود عباس اور سعودی ولیعہد کے د رمیان الاقوامی برادری پر انسانی بحران سے نمٹنے اور شہریوں کے تحفظ کی ضرورت پر زور دینے پر بات چیت ہوئی جب کہ صدر محمود عباس نے شاہ سلمان اور ولیعہد کی کوششوں کو سراہا۔ ٹیلیفونک گفتگو میں 22 ستمبر کو نیویارک میں بین الاقوامی امن کانفرنس کی تیاریوں پر بھی تبادلہ خیال کیا گیا۔اس حوالے سے فلسطینی صدر محمود عباس نے کہا کہ سعودی ولیعہد کی کوششوں سے متعدد ممالک نے فلسطینی ریاست کو تسلیم کرنے کا وعدہ کیا ہے ۔ دوسری جانب سعودی ولیعہد شہزادہ محمد بن سلمان سے یوکرینی صدر ولادیمیر زیلنسکی کا بھی ٹیلیفونک رابطہ ہوا جس دوران یوکرین جنگ پر تبادلہ خیال کیا گیا۔ محمد بن سلمان نے روس، یورکین تنازعہ کے حل اورمذاکرات کیلئے تمام کوششوں کی حمایت کا اعادہ کیا گیا جبکہ یوکرینی صدر نے امن کی حمایت کے حوالے سے سعودی عرب کے کردار کی تعریف کی۔
