انقرہ ۔ استنبول میں سعودی قونصلیٹ میں مبینہ طور پر صحافی جمال خشوگی کے قتل کے بعد سعودی ولی عہد شہزادہ محمد بن سلمان پہلی مرتبہ 22 جون کو ترکی کا دورہ کریں گے۔اے ایف پی کے مطابق ایک سینئر ترک اہلکار نے بتایا کہ 2018 میں صحافی جمال خشوگی کے قتل کے بعد سے انقرہ اور ریاض کے مابین تعلقات آگے بڑھ رہے ہیں۔ استنبول میں سعودی قونصل خانے کے اندر جمال خشوگی کے وحشیانہ قتل کے بعد شہزادہ محمد کا ترکی کا یہ پہلا دورہ ہے۔ عہدیدار نے کہا کہ دورہ کی تفصیلات کا اعلان ہفتہ کے آخر میں کیا جائے گا۔ عہدیدار نے مزید کہا کہ دونوں ممالک کے مابین کئی معاہدوں پر دستخط ہوں گے۔ ان کی ملاقات دارالحکومت انقرہ میں ہونے کی امید ہے لیکن مقام کی تصدیق ہونا باقی ہے۔ ترک صدر رجب طیب اردغان پہلے ہی اپریل کے اواخر میں سعودی عرب کا دورہ کر چکے ہیں، جہاں انہوں نے مکہ جانے سے قبل شہزادے سے ملاقات کی تھی۔ سعودی سرکاری خبر رساں ایجنسی ایس پی اے نے اس وقت کہا تھا کہ دونوں قائدین نے سعودی ۔ترک تعلقات اور انہیں تمام شعبوں میں ترقی دینے کے طریقوں کا جائزہ لیا۔
