نیویارک ،27ستمبر (سیاست ڈاٹ کام) ہندستان نے برازیل ،جرمنی اور جاپان
(G-4)
کے ساتھ ملکر اقوام متحدہ کی سلامتی کونسل میں اصلاح کرنے اور اس میں مستقل رکنیت حاصل کرنے کے لیے ایک مضبوط پلیٹ فارم تیار کیاہے ۔چاروں ملکوں نے سلامتی کونسل میں مستقل رکنیت کے لیے ایک دوسرے کی حمایت کرنے کے عزم کا اعادہ کیا۔ہندوستان ،برازیل ،جرمنی اور جاپان کے وزرائے خارجہ کی جمعرات کویہاں ایک اہم میٹنگ ہوئی ،جس میں چاروں ملکوں کے مابین اس سلسلہ میں اتفاق ہوا۔ چاروں ملکوں کے وزرائے خارجہ نے اس میٹنگ کے بعد مشترکہ بیان جاری کرکے کہا،‘‘ چاروں ملکوں نے بین الاقوامی امن وسلامتی کے لیے اہم ذمہ داری لینے کے لیے اقوام متحدہ کی سلامتی کونسل میں اصلاح کرنے اور اس میں رکنیت حاصل کرنے کے لیے ایک دوسرے کی حمایت کرنے کے عزم کا اعادہ کیاہے ۔مشترکہ بیان میں کہا گیاہے۔ اقوام متحدہ کی سلامتی کونسل کو زیادہ موزوں ،موثر اور نمائندہ بنانے کے لیے ترقی پزیر ملکوں اور اقوام متحدہ کے اہم ملکوں کے بہتررول کی تشریح کرنے کی ضرورت ہے ۔ اقوام متحدہ کی جنرل اسمبلی سے علیحدہ اس میٹنگ میں چاروں ملکوں نے 2005کے عالمی اجلاس میں ملکوں کے سربراہان اور حکومتوں کے ذریعہ پیش کیے گئے تصور کے مطابق اقوام متحدہ کی سلامتی کونسل میں جلد اور جامع اصلاحات کرنے کے تئیں اپنے عزم کا اعادہ کیا۔