ممبئی : سال 2025 بالی ووڈ اور ساؤتھ انڈسٹری کے لیے زبردست ثابت ہونے والا ہے۔ کئی بڑی فلمیں آنے والی ہیں، جن کیلئے شائقین کافی پرجوش ہیں۔ بلاشبہ اس سال بالی ووڈ کے بادشاہ شاہ رخ خان کی کوئی فلم نہیں آرہی تاہم دیگر سوپر اسٹارز پردے پر آئیں گے۔ سلمان خان، پربھاس، یش، سنی دیول ، ریتک روشن اور جونیئر این ٹی آر کی فلم وار2 سمیت کئی اداکار اپنی فلموں کی تیاریوں میں مصروف ہیں۔ دریں اثنا 2025 کی سب سے زیادہ متوقع فلموں کی فہرست آ گئی ہے۔ اس معاملے میں سلمان خان نے سب کو پیچھے چھوڑ دیا ہے۔سلمان خان جلد ہی باکس آفس پر دھوم مچانے والے ہیں۔ ان کی فلم سکندر عید پرآرہی ہے۔ فی الحال حتمی شیڈول مکمل نہیں ہوا تاہم اسے جلد مکمل کر لیا جائے گا۔ سلمان خان کی فلم سکندرآئی ایم ڈی بی2025 کی سب سے زیادہ متوقع فلموں کی فہرست میں پہلے نمبر پرآگئی ہے۔ یش کی فلم ٹاکسک دوسرے نمبر پر ہے۔ دراصل آئی ایم ڈی بی نے انسٹاگرام پر سب سے زیادہ متوقع فلموں کی فہرست جاری کی ہے۔ جہاں سلمان خان کے سکندر نے پہلا مقام حاصل کیا ہے ۔ یش کا ٹاکسک دوسرے نمبر پر ہے۔ اسفلم کی ریلیز کی تاریخ ابھی تک سامنے نہیں آئی ہے۔ رجنی کانت کی فلم قلی نے تیسرا اور اکشے کمارکی ہاؤس فل 5 نے چوتھا مقام حاصل کیا ہے۔اس فہرست میں اکشے کمار کی فلم کا بلند مقام حیرت انگیز ہے کیونکہ ان کی حالیہ درجنوں فلمیں بری طرح ناکام ہوئی ہیں ۔ امید کی جارہی ہے کہ شاید آنے والے دنوں میں اس فہرست میں رد بدل ہو۔ ریتک روشن اور این ٹی آر کی فلم وار 2 فی الحال اس فہرست میں 7 نمبر پر ہے لیکن امید ہے کہ آنے والے دنوں میں یہ فلم فہرست میں ترقی کرے گی ۔
