ممبئی:90 کی دہائی کی بالی ووڈ اداکارہ اور سلمان خان کی سابقہ گرل فرینڈ سومی علی نے ماضی کی تلخ یادیں تازہ کرتے ہوئے سلمان خان پر تشدد کے الزامات عائد کئے۔ میڈیا رپورٹس کے مطابق اداکارہ سومی علی نے فوٹو اینڈ ویڈیو شیئرنگ پلیٹ فارم انسٹاگرام پر طویل پوسٹ شیئر کرتے ہوئے سلمان خان کے ساتھ تعلقات ختم کرنے کی وجہ بتائی۔ انہوں نے انسٹا پوسٹ میں لکھا کہ ہر کوئی یہی سوال کرتا ہے کہ سومی علی اور سلمان خان کے درمیان کیا ہوا؟ انہوں نے اپنے اور سوپر اسٹار سلمان خان کے تعلقات کو بدترین تجربہ قرار دیتے ہوئے لکھا کہ وہ 8 برس جو میں نے اُس کے ساتھ گزارے وہ میری پوری زندگی کے بدترین سال تھے۔انہوں نے کہا کہ اس دوران سلمان نے مجھے نیچا دکھانے کا کوئی موقع ہاتھ سے جانے نہ دیا، گالی گلوچ، جھگڑوں کے ساتھ ساتھ مسلسل مجھے بدصورتی اور کم عقلی کے طعنوں کا نشانہ بنایا۔ انہوں نے مزید بتایا کہ اس کے ساتھ کوئی ایک دن بھی ایسا نہیں گزرا جب اس نے مجھے یہ احساس نہ دلایا ہو کہ میں بے وقعت اور حیثیت میں اس سے کم تر ہوں۔ سومی علی نے کہا کہ سلمان خان نے برسوں ہمارے رشتے کو راز میں رکھا، کبھی دنیا کے سامنے مجھے اپنی گرل فرینڈ تسلیم نہیں کیا۔
