مسلمانوں کے ووٹنگ فیصد میں اضافہ کا تقاضہ، جناب عامر علی خان صاحب کا خطاب
نظام آباد :6 ؍ مارچ ( سیاست ڈسٹرکٹ نیوز )جناب عامر علی خان نیوز ایڈیٹر سیاست و ر کن قانون ساز کونسل نے کہا کہ مسلمانوں کو آبادی کے تناسب سے فیصلہ ساز اداروں میں نمائندگی ضروری ہے تاکہ سماجی انصاف ہوسکے ۔ لمرا گارڈن فنکشن ہال بودھن روڈ نظام آباد میں المکتب الاسلامی نظام آباد کے زیرا ہتمام تہنیتی و تربیتی اجلاس سے خطاب کرتے ہوئے ان خیالات کا اظہار کیا ۔ جناب عامر علی خان نے کہا کہ فرقہ پرستی کے خاتمہ اور سیکولرازم کے استحکام کیلئے سب سے پہلے مسلم ووٹوں کے تناسب میں 5 تا 10 فیصد اضافہ کرنے کی ضرورت ہے ۔یہ کوشش فرقہ پرست کے ناپاک عزائم کو ناکام بناسکتی ہے ۔ نیوز ایڈیٹر سیاست و نامزد رکن قانون ساز کونسل نے بتایا کہ گذشتہ لوک سبھا انتخابات میں 200 ایسے پارلیمانی حلقے ہیں جہاں بی جے پی کے امیدوار صرف 2 ہزار تا 10 ہزار ووٹوں کی اکثریت سے کامیاب ہوئے ہیں ملک میں سیکولرازم کی فضاء کو فروغ دینے کیلئے مسلمانوں کو گھروں سے نکال کر پولنگ بوتھس پہونچانے کی ضرورت ہے ۔ بالخصوص مسلم خواتین کے ووٹنگ تناسب میں اضافہ کرنا وقت کا تقاضہ ہے ۔ گلہ شکوہ بہت ہوچکا اندھیرا دور کرنے کیلئے اپنے حصہ کا چراغ روشن کرنے کی ضرورت ہے ۔ عامر علی خان نے بتایا کہ ریاست میں ایس ٹی طبقہ کی آبادی 43 لاکھ ہے ، ان کا سالانہ بجٹ 9800 کروڑ ہے ایس سی طبقہ کی آبادی 56 لاکھ سے زیادہ ہے ان کا بجٹ 17 ہزار کروڑ ہے ۔ اقلیتوں کی آبادی 50 لاکھ ہے مگر ان کا بجٹ 2200 کروڑتھا ۔ ہم نے بی آرایس اور کانگریس کے سامنے اقلیتوں کا بجٹ 5 ہزار کروڑ روپئے کرنے کی تجویز پیش کی کانگریس نے ہماری تجویز کو قبول کیا ۔ کانگریس نے مجموعی بجٹ میں 2200 سے زیادہ کا بجٹ مختص کیا گیا مکمل بجٹ میں 4 ہزار کروڑ سے زیادہ بجٹ ہوسکتا ہے ۔ اقلیتوں کیلئے جو بجٹ مختص کیا جارہا ہے اس کو پورا پورا خرچ کروانا ہم سب کی ذمہ داری ہے ۔ حافظ محمد لئیق خان صدر ضلع جمعیت العلماء نظام آباد نے اپنے خطاب میں روزنامہ سیاست کی خدمات پر روشنی ڈالی ۔ جناب عامر علی خان کی جانب سے شروع کردہ 12% فیصد مسلم تحفظات کا تذکرہ کیا اور کہا کہ جناب عامر علی خان سے قوم و ملت کو کافی امیدیں وابستہ ہیں ۔ گورنر کوٹہ میں کونسل کا رکن بنانے پر ہم جناب عامر علی خان کو دل کی گہرائیوں سے مبارکباد پیش کرتے ہیں ۔ قبل ازیں جناب عامر علی خان کے ہاتھوں محاسن ولی اللہ کتاب کی رسم اجرائی عمل میں آئی ہے ۔ اس موقع پرمولانا عبدالقوی حیدرآباد ، مولانا عظمت اللہ سعیدذمہ دار شریعہ بورڈ ، حافظ فیاض ، مولانا ارشد علیم ، حافظ اشرف علی ، مولانا عبدالقیوم شاکر ، مولانا اسماعیل عارفی صدر حج سوسائٹی نظام آباد ، وسیم احمدخان خازن حج سوسائٹی نظام آباد ،مولانا عبدالقدیر حسامی کے علاوہ دیگر موجود تھے ۔