ممبئی ۔ بالی ووڈ کی اداکارہ پائل گھوش نے انوکھی شرط رکھتے ہوئے ہندوستانی فاسٹ بولر محمد سمیع کو شادی کی پیشکش کر دی۔ آئی سی سی ورلڈکپ کے 33 ویں میچ میں جہاں ہندوستان نے سری لنکا کو یک طرفہ مقابلے کے بعد بڑے فرق سے شکست دی، وہیں فاسٹ بولر محمد سمیع کی شاندار بولنگ نے بالی ووڈ کی اداکارہ پائل گھوش کا دل بھی جیت لیا۔ جاری ورلڈ کپ کے دوران محمد سمیع نے اب تک 4 میچز میں16 وکٹیں حاصل کیی ہیں۔ سماجی رابطے کی ویب سائٹ ایکس (سابق ٹوئٹر) پر پوسٹ شیئرکرتے ہوئے اداکارہ نے ہندوستانی کھلاڑی کو ٹیگ کیا اور انوکھی شرط کے ساتھ ان کی دوسری اہلیہ بننے کے لیے رضا مندی ظاہر کردی۔ اداکارہ نے اپنی پوسٹ میں لکھا کہ محمد سمیع! اپنی انگریزی سدھار لو، میں تم سے شادی کرنے کے لیے تیار ہوں۔اس کے ساتھ ہی انہوں نے ہنسنے والے ایموجزکا اضافہ بھی کیا ہے۔واضح رہے کہ محمد سمیع اور معروف ماڈل حسین جہاں 2014ء میں شادی کے بندھن میں بندھے تھے تاہم ان کی شادی زیادہ عرصہ چل نہ سکی اور مارچ 2018ء میں دونوں نے علیحدگی اختیار کرنے کا فیصلہ کیا۔ان کا علیحدگی کا مقدمہ عدالت میں زیر سماعت ہے۔
