رکن لوک سبھا کیخلاف پانچویں کارروائی، بجلی چوری کے الزام پر 1.91 کروڑ روپئے جرمانہ
سنبھل، یوپی: سنبھل کے سماج وادی پارٹی کے ایم پی ضیاء الرحمن برق پر لگاتار ریوگی کی زیر قیادت ریاستی حکومت کا شکنجہ کسا جا رہا ہے۔ پچھلے 24 گھنٹوں میں ایس پی ایم پی کے خلاف یہ پانچویں کارروائی ہے۔ چھاپہ، ایف آئی آر اور بجلی کٹوتی کے بعد اب ان کے گھر پر یوگی حکومت کی بلڈوزر کارروائی ہوئی ہے۔ یوگی حکومت کا بلڈوزر ان کے گھر پہنچ گیا ہے، سیڑھیاں منہدم کر دی گئی ہیں۔ رکن لوک سبھا نے گھر کے باہر نالے کے اوپر سیڑھیاں بنوائی تھیں۔ بلدیہ نے یہ کارروائی انجام دی ہے۔سماج وادی پارٹی کے رکن پارلیمنٹ ضیاء الرحمن کی مشکلات کم ہونے کے آثار نظر نہیں آ رہے ہیں۔ بلڈوزر کی کارروائی سے قبل اینٹی پاور تھیفٹ پولیس نے 19 ڈسمبر کو ایس پی ایم پی کیخلاف بجلی چوری کا مقدمہ درج کر لیا۔ اس کے علاوہ محکمہ بجلی نے ان پر 1.91 کروڑ روپے کا جرمانہ عائد کیا۔بجلی چوری کے الزام میں محکمہ نے دوپہر کو ایس پی لیڈر کے گھر کا بجلی کا کنکشن بھی منقطع کر دیا تھا۔ تاہم رکن پارلیمنٹ کے وکیل نے چھاپے پر اعتراض کرتے ہوئے اوور لوڈنگ کے الزام کو مسترد کر دیا ہے۔ انہوں نے بتایا کہ گھر میں دس کلو واٹ کا سولر پیانل اور پانچ کلو واٹ کا جنریٹر بھی نصب ہے۔ گزشتہ صبح محکمہ برقی کی ٹیم نے پولیس کی بھاری نفری کی موجودگی میں ان کے گھر پر بجلی چوری اور بے ضابطگیوں کی چھان بین کی تھی۔