کولکتہ ۔ مغربی بنگال کی وزیر اعلیٰ ممتا بنرجی نے مبینہ منی لانڈرنگ معاملے میں شیوسینا لیڈر سنجے راؤت کو انفورسمنٹ ڈائریکٹوریٹ (ای ڈی) کے ذریعہ نوٹس بھیجے جانے پر مرکز کی مودی حکومت کو تنقید کا نشانہ بنایا۔ انھوں نے کہا کہ ’’میں نے سنا ہے مہاراشٹر میں شیوسینا کے ایک لیڈر کو آج ای ڈی سے سمن ملا ہے۔ میں نے سنا ہے کہ ان کی ملکیت کو بھی قرق کرنے کی کوشش کی جا رہی ہے۔ یہ بی جے پی کی پالیسی ہے۔ جب بھی وہ کسی اپوزیشن لیڈر کو پریشان کرنا چاہتی ہے یا ریاستی حکومت کو گرانا چاہتی ہے تو ایسا ہوتا ہے۔‘‘ممتا بنرجی نے بردوان میں ایک سرکاری تقریب میں اپنے خطاب کے دوران کہا کہ ’’یہ ہر جگہ کیا جا رہا ہے۔ اگر آپ سچ بولتے ہیں تو سی بی آئی اور ای ڈی آپ کو پریشان کریں گے۔ ملک میں زندگی اس طرح آگے نہیں بڑھ سکتی ہے۔ سبھی کو اس طرح کیوں دھمکی دی جاتی ہے؟‘‘
