سنگاریڈی 28 نومبر (سیاست ڈسٹرکٹ نیوز) سنگاریڈی میں سردیوں میں اضافہ اور کہر چھا جانے کی وجہ سے ٹریفک مشکلات کا سامنا عوام کو کرنا پڑ رہا ہے ضلع ایس پی پَریتوش پنکج آئی پی ایس نے کہا کہ صبح 8 بجنے کے باوجود گھنی دھند نے سنگاریڈی شہر کو پوری طرح اپنی لپیٹ میں لے لیا ہے۔ ایسی صورتحال میں ضلع کے عوام کو چاہیے کہ غیر ضروری سفر سے گریز کریں اور ضرورت پڑنے پر ہی باہر نکلیں دھیمی رفتار میں گاڑی چلانا ہی جانوں کے تحفظ کی ضمانت ہے ایس پی نے مزید کہا کہ سردیوں میں درجۂ حرارت کم ہونے سے دھند گہری ہو جاتی ہے، جس کے باعث سڑکوں پر سامنے سے آنے والی گاڑیاں نظر نہیں آتیں اور حادثات کے امکانات بڑھ جاتے ہیں۔ گاڑیوں سے نکلنے والا دھواں دھند کو مزید گہرا کر دیتا ہے جس سے صبح 8 بجے تک بھی سڑکیں واضح طور پر دکھائی نہیں دیتیں، لہٰذا اس وقت سفر کرنا نہایت خطرناک ثابت ہو سکتا ہے۔انہوں نے کہا کہ گاڑیوں کی ہیڈ لائٹس آن رکھنے کے باوجود بھی سامنے والی گاڑیاں قریب آنے تک دکھائی نہیں دیتیں۔ اگر رفتار زیادہ ہو تو ٹکر اور دیگر حادثات ہونے کا امکان بڑھ جاتا ہے۔ کم رفتار میں سفر کرنے سے ڈرائیور سامنے آنے والی رکاوٹ یا گاڑی کو بروقت دیکھ کر محتاط رہ سکتا ہے اور حادثات سے بچا جا سکتا ہے۔ایس پی نے یہ بھی مشورہ دیا کہ سردیوں میں سفر کرتے وقت ہیڈ لائٹس اور انڈیکیٹر لازمی طور پر آن رکھیں۔ ضرورت کے بغیر رات کے وقت یا شدید دھند میں سفر نہ کریں۔ تمام ڈرائیور حضرات ہیلمٹ اور سیٹ بیلٹ لازماً استعمال کریں۔
