ممبئی ، 28 ڈسمبر (ایجنسیز) بالی ووڈ کے ایکشن ہیرو سنیل شیٹی نے اپنے کریئر میں کئی بلاک بسٹر فلمیں دی ہیں۔ وہ رومانی ہیرو اور کامیڈی اداکاری میں بھی مداحوں کا دل جیتنے میں کامیاب رہے ہیں۔ اداکار سنیل شیٹی کی پہلی شناخت مضبوط ڈیل ڈول رکھنے والے فائٹرز ہیرو کی رہی ہے۔ وہ اپنی فلموں میں ویلن کی بُری طرح پٹائی کرتے نظر آتے ہیں۔ سنیل شیٹی کی ترجیح ہوتی تھی کہ وہ خطرناک اسسٹنٹ مناظر بھی خود فلم بند کروائیں اور اس کوشش میں وہ متعدد بار زخمی بھی ہوئے۔ ان ایکشن سین کی وجہ سے وہ نوجوانوں میں کافی مقبول ہوئے اور انھیں زیادہ تر ایسے ہی کرداروں میں پسند کیا جاتا رہا ہے۔ سنیل شیٹی بھی اپنے مداحوں بالخصوص نوجوانوں کیلئے ہمیشہ ایک رول ماڈل بننا چاہتے تھے جس کا انھوں نے عملی مظاہرہ 40 کروڑ کی پیشکش کو ٹھکرا کر کیا تھا۔ اس واقعے کو یاد کرتے ہوئے حالیہ انٹرویو میں سنیل شٹی نے انکشاف کیا کہ تمباکو کے معروف برانڈ کے اشتہار میں کام کرنے کیلئے 40 کروڑ روپئے کی آفر ہوئی تھی۔ سنیل شیٹی نے بتایا کہ اُس وقت نوجوان مجھے فالو کرتے تھے، میرا اسٹائل اپناتے تھے اس لئے میں نے سگریٹ کا اشتہار کرنے سے منع کردیا تھا۔ انھوں نے مزید بتایا کہ اگر میں اشتہار میں سگریٹ نوشی کرتا نظر آتا تو نوجوان بھی اس شوق کو اپناتے اور کہیں کوئی کسی بری لت میں نہ پڑے جائے، اس لئے میں نے وہ اشتہار نہیں کیا۔ سنیل شیٹی نے کہا کہ میں خود بھی سگریٹ نہیں پیتا بلکہ اس کی حوصلہ شکنی کرنا چاہتا ہوں۔