حیدرآباد: سن رائزرس حیدرآباد کے کپتان پیاٹ کمنس نے شہرحیدرآباد کے کرمن گھاٹ کے ضلع پریشد اسکول میں طلبا کے ساتھ کرکٹ کھیلی اور ان کی حوصلہ افزائی کی۔ انہوں نے اسکول میں منعقدہ بوٹ کیمپ پروگرام میں بطور مہمان خصوصی شرکت کی۔ان کی بچوں کے ساتھ کرکٹ کھیلتے ہوئے تصویر اورویڈیوزسوشیل میڈیا کے مختلف پلیٹ فارمس پر تیزی کے ساتھ وائرل ہوگئی۔اس ویڈیو میں دکھایاگیا ہے کہ کمنس بلے بازی کررہے ہیں جبکہ ایک لڑکا ان کو گیند پھینک رہا ہے۔ آسٹریلیائی کھلاڑی کو آئی پی ایل ٹیم ایس آر ایچ نے 20.5کروڑروپئے میں خریداتھا، جنہوں نے اپنی ٹیم کو 2024کے سیزن میں پلے آف میں پہنچایا۔ کمنس کو اسکول کے بچوں نے سائنسی آلات کے استعمال، ان کے چلانے کا طریقہ اور سائنسی نقطہ نظر سے نئے آلات کی تیاری کی تفصیلات سے واقف کروایا۔ اس پروگرام میں یونیسیف تلنگانہ اسٹیٹ انچارج ایس مدھوسدن راؤ، ایس پی ڈی ملیا،ڈسٹرکٹ ایجوکیشن آفیسر سوسیندر راؤ، ڈسٹرکٹ سائنس آفیسر سرینواسا راؤ اور دیگر نے شرکت کی۔
